- Publika iha: 29 Abril 2014
Udan bo’ot ne’ebe akontese durante fulan Fevereiru 2014, estraga tiha ponte Hatulia, iha distritu Ermera, tanba ne’e Membru Parlamentu Nasional husu ba ministeriu relevante atu toma atensaun.
Membru Komisaun E (transporte, telekomonikasaun no infra-estrutura), Deputadu Manuel Castro, hateten ponte ne’e kompania halo remata tiha ona, maibe tanba udan entaun naksobu fila fali.
“Hau la komprende obra ne’e foin maka halo, maibe agora at fali ona,” Deputadu Castro hateten, iha Parlamentu Nasional.
Tuir nia, ponte ne’e at ba dala rua ona, primeiru at iha tinan kotuk no agora at fali ona e governu no kompania iha dever atu responsabiliza ba ponte ne’e.
“Ne’e tenke hadia, tanba komuniadade presiza duni,” Deputadu Castro ejiji.
Entretantu Sekretariu Estadu Obras Publiku (SEOP), Luis Vaz Rodrigues, rekonese katak obra ne’e agora dadaun iha kondiasaun at no agora tama ona iha diskusaun oinsa atu hadia fali.
“Ponte ne’e kotu no agora tama iha projetu emerjensia,” SE Rodrigues hateten.
Mesmu membru PN balun la konkorda atu obra ne’e tama iha emerjensia, maibe nia dehan, hakarak ga lakohi tenke hadia ho emerjensia, tanba povu presiza duni ponte ne’e.
“Ne’e nesesidade povu nian atu ultra pasa ba sub-distritu seluk,” nia dehan.
Nia dehan, ponte ne’e uluk halo ho emerjensia mos, tanba ne’e MP balun lakohi atu hadia hoa ho emerjensia tan.