- Publika iha: 09 Abril 2014
Iha fiskalizasuan Komisaun D Parlamentu Nasional iha suku Ben-Ufe, sub-distritu Nitibe, distritu Oe-Cusse, deskobre katak komunidades uma kain 90 mak hetan dezastre naturais, maibe governu seidauk fo ajudus ba sira.
Membru Komisaun D (ekonomia no dezenvolvementu), Deputadu Adriano Joao, hateten komunidades uma kain 90 ne’e hetan dezastre rai hala’I hodi estraga hotu sira nia uma no to’os.
Nia hateten, iha Sabadu, dia 08 Fevereiru tinan 2014, iha tuku 06:00 dader komunidade Manana no Citrana, suku Ben Ufe, sub-distritu Nitibe hakfodak ho udan bo’ot ne’ebe rezulta mota bo’ot tama sira nia uma laran.
“Uma kain 90 hetan estragus inklui to’os uma kain 20 nian mak hetan estragus,” Deputadu Joao hateten, iha Parlamentu Nasional.
Deputadu husi bankada Partidu Demokratiku (PD) ne’e, dehan komunidade uma kain 90 oras ne’e dadauk balun hela iha eskola, balun hela iha kapela no balun hela iha sede suku.
“Sira araska tebes, sa’tan fos iha Oe-Cusse saku ida sa’e to’o $30,” Deputadu Joao hateten.
Maibe nia dehan, vitima hirak ne’e lideransa komunitariu foti ona dadus no hato’o ona ba diresaun rejional Ministeriu Solidariedade Sosial (MSS) distritu Oe-Cusse nian, mais to’o agora seidauk iha resposta.
Iha sorin seluk komunidade Agostino Cunha, ne’ebe hein roo iha Porto Dili, hateten durante fulan Fevereiru, distritu Oe-Cusse udan maka’as hodi bee tama hotu ba populasaun sira nia uma.
“Komunidade suku Ben-Ufe to’o oras ne’e balun sei hela iha eskola, tanba sira nia uma bee tama hotu, ,” nia hateten.
Tanba ne’e nia husu ba gavernu atu fo ajuda umanitariu ba sira, atu nune’e sira bele rekonstrui fila fali ba sira nia hela fatin.
Hatan ba preokupasaun ne’e Sekretariu Estadu interino asuntu Parlamentar, Nelio Isaac Sarmento ne’ebe simu ona informasaun husi Ministeriu Solidariedade Sosial, katak vitima sira ne’e MSS rejional distritu Oe-Cusse mak atende .
“Ita iha sasan balun ne’ebe iha hela distritu ne’eba, agora sira sei identifika hela atu fo ajuda ba sira,” nia hateten.