Kazu 1143 Julga Iha Tribunal Movel

Hafoin estabelese iha tinan 2010, kazu hamutuk 1143 mak konsege julga iha tribunal movel e Country Diretor United Nation Development Program (UNDP) iha Timor -Leste,  Claudio Providas, konsidera ne’e progresu ne’ebe diak.

Nia dehan, tribunal movel ne’e estabelese ho objetivu atu fo dalan ba komunidade iha area rural hodi asesu ba justisa.

“Numeru kazu 1143 ne’e bo’ot, maibe kazu sira ne’e julga liu husi tribunal movel, ne’e hatudu komunidade iha area rural mos bele asesu ba justisa,” nia hateten.

Nia dehan, durante tribunal movel ne’e la’o, UNDP konsege suporta ona ekipamentus no rekursu humanus.

“Oferese tekniku espesialista sira, transfere sira nia matenek ba judisial nasional sira,” nia hateten.

Tanba tuir nia, wainhira ema hotu asesu ona ba justisa entaun sei iha estabilidade iha rai laran.

“Justisa ne’e hanesan dalan ida atu hetan estabilidade, tanba ne’e UNDP hamutuk ho instituisaun judicial sira lori justisa ne’e ba ema hotu,” nia hateten.

Iha parte seluk Membru Parlamentu Anna Ribeiro, hateten tribunal movel ne’e ajuda tebes komuniade ne’ebe mak kbi’it laek sira.

“Laiha osan atu mai iha tribunal iha munisipiu, entaun tribunal movel ne’e bele ajuda sira,” Deputada ne’e hateten.

Kona ba kazu hamutuk 1143 mak julga liu husi tribunal movel, nia dehan ne’e hatudu katak antusiasmu komunidade ba justisa formal ne’e bo’ot tebes.