- Publika iha: 03 Janeiro 2024
Secretário Estado Para a Protesaun Civil (SEPC), Domingos Mariano Reis, hatete Timor-Leste halo pedidu ba iha Indonesia atu kontinua hametin kooperasaun entre rai rua iha área (3) tolu inklui marítima, aero, no fronteira iha Suai, Mota-ain, no Oecusse.
SE Reis haktuir salienta koperasaun bilaterál entre Timor-Leste ho Indonesia iha protesaun sivíl nian espesífiku ba jestaun dezastres nian.
“Importante tanba bainhira mosu inundasaun no dezastre boot ne’ebé afeta iha rai rua, ita sei halo intervensaun integradu. Ne’e importante, tanba ita haree ba iha área marítima nian ita-nia ró ne'ebé halo movimentu Díli ba Oecusse bainhira hetan dezastre ruma, ita presiza hetan apoia husi Indonesia, tanba ita-nia rekursu umanu sei limitadu,” dehan nia.
Nia mós agradese ba governu Indonesia, tanba iha komitmentu boot atu apoia Timor-Leste, entermus lojístika no kapasitasaun rekursu umanus.
“Timor-Leste solisita atu nune’e Indonesia bele simu ita-nia funsionáriu sira atu nune’e bele kapasita sira hodi bele hasa'e koñesimentu kona-ba jestaun dezastre nian no fó apoiu rekuperasaun ba vítima sira ne’ebé afeta ba dezastre.
Tanba ita tinan kotuk [fulan Abril 2021] ita hetan dezastre boot. Ita mós hetan apoia husi Indonesia, liuhusi nia embaxada iha Timor-Leste,” dehan nia.
Iha fatin hanesan Sekeretária Utama, Badan Nacional Penanggulan Bencana (BNPB), Indonesia nia Ajensia Nasional Responde ba Dezastres, Dr Rustian, hateten sira mai iha Timor-Leste atu diskuti oinsá nasaun Timor-Leste no Indonesia bele servisu hamutuk, liuliu iha área protesaun sivíl.
“Entaun signifika katak, iha futuru akontese dezastre naturais, nasaun rua ne’e iha komitmentu bele fahe hanoin ba malu, oinsá bele rezolve. Ida ne’e ita sei kontinua nafatin nomós ita sei fahe esperiénsia ba funsionáriu sira iha Timor-Leste nomós iha Indonesia”, nia dehan.
Dr Rustian mós haktuir durante ne’e Indonesia sempre ajuda sasán ne’ebé nasaun viziñu sira presiza, bainhira dezastre ruma akontese, tanba ne’e hein katak iha tempu badak Indonesia ho Timor-Leste sei asina memorandum hodi servisu hamutuk besik liután.