- Publika iha: 09 Maio 2024
Komandante Polísia Munisipiu Díli, Superintendente Xefe Orlando Gomes hateten, asidente tráfiku ne'ebé mak rejistu iha kapital Dili iha fulan abril 20240ho total 102 kompostu husi kanek todan ema na’in 17, kanek kaman ema na’in 80, no lakon vida ema na’in 5.
"Iha fulan Abril ne'e ita rejistu ema na’in 5 mak lakon vida kauza husi asidente ne’ebé akontese iha kapital Díli iha área Tasi Tolu, Becora, Kolmera, no Pantai Kelapa," nia hatete.
Nia dehan, husi asidente refere, polísia prende evidénsia hanesan kareta no motorizada hamutuk 120 mak dadaun ne'e asegura hela iha komandu polísia munisípiu Díli.
"Kazu hirak ne'e ita aprezenta ba Ministériu Publiku hodi kontinua prosesu ba tribunal, nune’e bele halo prosesu kontinua ba autór kriminozu sira," Komandante Polísia Munisipiu Díli Superintendente Xefe Gomes dehan.
Komandante polísia husu ba motorista sira, bainhira kondus kareta motorizada tenke iha konsentrasaun no labele hemu lanu tiha mak kondus kareta no motorizada to’o hetan asidente balun mate, tohar, no kanek.
Nia hatutan, durante fulan abril nia laran husi atividade operasional cek point ne’ebé mak ekipa tránzitu sira halo, kontribui ona reseitas hamutuk $20.856.00 ba kofre estadu.
“Durante ne'e aprezenta ona viaturas hamutuk 200 ba Patrimoniu Estadu, tanba motorizada nain sira la mai foti liu fulan 3 polísia entrega ba patrimóniu estadu,” dehan Komandante.
Entretantu motorista Estevão Fatima dehan, kazu asidente sira ne’ebé akontese hodi rezulta balun mate no tohar ne'e mai husi arogansia motorista sira-nian.
"Ha’u dehan arogansia husi motorista sira, tanba lori motorizada ho karreta iha estrada ne'e la respeita sinais tranzitu sira, no halai ho velosidade ne'ebé mak boot ikus la iha konsentrasaun tenke hetan asidente," nia dehan.
Nu’udar motorista nia hakarak husu ba maluk motorista sira, bainhira halo movimentu ho karreta ka motorizada tenke respeita sinais tránzitu sira atu nune'e labele rezulta asidente.