- Publika iha: 02 Outubro 2023
Eskola Ensinu Báziku Central (EBC), iha Bidau Akadiru-Hun, iha kapital Dili, durante ne'e estudante balun tur deit iha rai hodi partisipa aula, tanba ne’e sira husu Ministériu Edukasaun (ME) aumenta tan karteira eskolárba sira-nia eskola.
Diretór EBC, Roberto Jerónimo Cristovão hatete durante ne'e difikuldade ne’ebé eskola refere enfrenta mak falta kadeira no meza ba estudante sira halao aprendizajen.
"Ita husu Ministériu Edukasaun atu aumenta karteira eskolár hamutuk 40 ba ensinu báziku sentral Bidau Akadiru-Hun, atu nune'e estudante sira bele tuur hodi tuir prosesu aprendizajen kada loron," nia dehan.
Nia dehan, durante ne'e bainhira iha prosesu aprendizajen estudante balun utiliza kadeira professór nian, no balun hambrik de’it mak tuir prosesu aprendizajen iha aula laran.
Nia dehan, ho problema menus kadeira no meza ne’ebé sira hasoru ne'e husi parte eskola halo ona karta ba ME maibé seidauk iha rezultadu to'o ohin loron.
"Iha tinan kotuk ne'e inan-aman estudante sira mak oferese kadeira hamutuk 40 mai ita atu bele fasilita estudante sira hodi asesu ba prosesu aprendizajen," Diretór Roberto dehan.
Maibé nia dehan, kadeira 40 ne’ebé oferese husi inan-aman aat hotu ona, nune'e husu ba ME atu bele kompleta tan kadeira no meza, tanba kada tinan númeru estudante sempre aumenta.
Entretantu, Sekretáriu Estadu Ensinu Sekundáriu Jerál no Tékniku Vokasionál iha ME, Domingos Lemos Lopes dehan problema menus kadera no meza, nune'e mós infraestrutura eskolár ne'e iha ona planu prioridade Governu foun nian hodi rezolve.
"Ita tau ona iha planu prioridade no espera katak ita bele rezolve problema hirak ne’ebé eskola iha teritóriu laran enfreta," nia informa.
Enkuantu nia dehan, antes iha governu anteriór mós konsegue responde ona kadeida no meza hamutuk 4,000 ba eskola hamutuk 79 iha teritóriu tomak, maibé seidauk sufisiente, tanba ne'e presiza aumenta tan.