- Publika iha: 19 Setembro 2023
Ministra Edukasaun Dulce de Jesus Soares dehan, IX Governu iha programa prioridade tolu inklui ensino Pre-Eskolar, Merenda Eskolár nune'e mós kontinua hadia Infarestrutura Eskolár.
Nia dehan, tuir monitorizasaun ne’ebé ekipa halo ona hatudu katak iha setór edukasaun sei iha problema maioria iha área tolu refere, tanba ne'e governu presiza tau iha prioridade hodi bele rezolve.
"Ita-nia IX governu iha programa prioridade ba foku uluk hodi hadia área Pre-Eskolár liuhusi aumenta pre-eskolar iha teritoriu laran. Ba infraestrutura nian ita sei konstrui tan saladeaula 1,000 kompleta ho be'e moos, saneamentu, nune'e mós hadia kualidade merenda eskolár," nia dehan.
Nia dehan, eskolas pre-eskolár ne’ebé eziste durante ne'e iha 20% de’it, ida-ne'e menus tebes no seidauk kobre iha teritóriu laran, tanba ne'e presiza aumenta to'o iha suku sira hodi fasilita estudante sira tinan 3 to'o 5 anos sira aprende.
"Kona-ba infraestrutura eskola iha presiza konstrui tan saladeaula hamutuk 9,000, tanba tuir monitorizasaun ne’ebé iha eskola sira kontinua menus saladeaula, kada tinan estudante sempre aumenta," ME Soares dehan iha Ministériu Finansas Airarak-Laran, Díli.
Enkuantu nia dehan, kona-ba merenda eskolár maioria eskola sira la iha dapur ne’ebé ijiene, nune'e mós la iha refeitóriu nune'e mós ekipamentu dapur sira feruzin hotu ona.
"Ita presiza tau atensaun atu bele hadook estudante sira husi moras," Ministra Edukasaun Soares salienta.
Entretantu, Koordenadór Rede Education Timor-Leste Coalition for Education (TLCE), Jose Monteiro dehan, rezolve problema saladeaula ne'e importante, tanba númeru estudante ne'e kada tinan sempre aumenta.
"Ita lakohi haree estudante sira tuur iha rai hodi aprende nune'e mós númeru estudante iha saladeaula tenke tuir padraun katak iha saladeaula ida tenke priense estudante totál na’in 35 labele liuhusi ne'e, atu nune'e fasil profesór sira hodi kontrolu," nia dehan.
Enkuantu kona-ba merenda eskolár ne'e la’ós haree de’it ba dapur no matéria sira maibé presiza hadia mós menu atu nune'e bele kontribui ba nutrisaun estudante nian nune'e mós hasa'e abilidade estudante nian.