- Publika iha: 15 Setembro 2023
Ministériu Edukasaun (ME) ho Komisaun Funsaun Públika (CFP) konkorda ona hodi aplika área prioridade haat (4) hanesan, subsídiu transporte ba profesór sira, asesu ingresu espesial, reforma no kargu xefia sira.
Ministra Edukasaun Dulce de Jesus Soares dehan, ME ho CFP halo ida-ne'e ba prosessór sira atu sira bele goza orsamentu transporte, sira mós bele hakat ba rejime kareira espesial, no presiza halo reforma iha forsa de traballu Ministériu Edukasaun.
"Ita Ministériu Edukasaun ho Komisaun Funsaun Públika (CFP) ita konkorda ona hodi aplika área prioridade haat ne'e hodi valoriza profesór sira dedikasaun durante ne'e ba dezenvolvimentu setór edukasaun iha Timor-Leste," nia dehan iha Matadoru.
Nia haktuir apoiu subsídiu ne'e bazeia ba lei ne’ebé promulga iha fulan Juñu 2023 katak kada fulan profesór sira sei hetan 25 dolar ba transporte.
"Ita-nia ekipa halo ona identifikasaun ba profesór sira ne’ebé ida direitu ba subsídiu refere, nune'e mós ba rejime kareira espesial no reforma nune'e mós halo mudansa ba kargu xefia sira," ME Soares salienta.
Enkuantu totál profesór ne’ebé hetan subsídiu ba transporte hamutuk desmil sentu vinte oitu (10,128) pesoas, asesu ba ingresu espesial 5 mil pesoas nune'e mós reforma no kargu xefia sira.
Iha fatin hanesan, Prezidente Komisaun Funsaun Públika (CFP) Faustino Cardoso dehan, CFP hatudu vontade forte oinsa servisu hamutuk hodi rezolve situasaun ne’ebé profesór sira hasoru durante ne'e.
"Durante ne'e Komisaun Funsaun Públika CFP servisu hamutuk ho Ministériu Edukasaun hodi rezolve ita-nia profesór sira-nia problema mak saláriu, liuhusi subsídiu ne’ebé ita oferese nune'e mós asesu ba ingresu espesial ne'e hanesan meios hodi rezolve saláriu profesór sira nain," nia dehan.
Alende ne'e nia dehan, ba kestaun halo dezenvolvimentu ba setor edukasaun CFP prontu apoiu programa nonu governu nian liu-liu hadia saláriu profesór sira-nain liuhusi nivel eskalaun sira.