ME Tenke Sériu Rezolve Problema Kartera Eskolár

Diretor Ensino Básico Central 123 Manleuana, iha kapital Dili, Feliciano Domingos Tilman dehan, kada tinan númeru estudante sira iha eskola sempre aumenta, maibé kadera no meza sai problema ba estudante sira, tanba estudante barak liu entaun sira tenke hadau malu kartera eskolár.

“Ita husu ba Ministériu Edukasaun (ME) tenke sériu rezolve problema kartera eskolár ba eskola sira la’ós iha EBC 123 Manleuana de’it, maibé iha teritóriu laran, tanba menus kadera no meza iha eskola mós bele kuntribui ba konflitu entre estudante sira, tanba hadau malu,” Diretor Tilman dehan.

Nia salienta tan katak presiza governu nia polítika oinsá atu bele kompleta kartera eskolár iha tempu besik, nune’e mós bele responde ba volume estudante kada eskola, atu bele rezolve problema menus kadera meza iha eskola sira iha rai laran.

“Enkuantu dadaun ne’e totál ita-nia estudante iha EBC 123 Manleuana hamutuk na’in 1920 no kompara ba kartera eskolár estudante barak liu,” Diretor Tilman hatete.

Entretantu, Diretor Nasional Infraestrutura no Edukativu iha Ministeriu Edukasaun, Helio Lopes, dehan dadaun ne’e ministériu prepara ona kartera eskolár hamutuk 8000 hodi distribui ba eskola hamutuk 100 resin ne’ebé identifikadu ona menus kadera no meza.

“Kartera eskolár hirak ne’e ita asegura hela iha armajem ministériu nian, hodi distribui ba eskola ne’ebé mak identifikadu ona kompostu husi pre-eskolár to’o sekundariu,” nia informa iha knar fatin ME, iha Vila-Verde, Díli.

Nia dehan, eskola 100 resin ne’ebé identifkadu ne’e verifika liuhusi proposta ne’ebé mak hato’o husi parte eskolár nian, no ministériu sei rezolve tuir nesesidade kada eskola presiza.

“Kartera eskolár hirak ne’e ita sei distribui barak liu ba iha ensinu baziku, tanba volume estudante barak liu komapara ho pre-eskolár no sekundariu sira,” Diretor Lopes dehan.

Nia dehan kartera eskolár hirak ne’e preparadu ona ne’e hein husi parte lonjístika kompleta tiha dokumentu balun mak sei distribui ba eskola 100 resin ne’e.