- Publika iha: 14 Julho 2017
Komisaun Nasional ba Elisaun (CNE) sensibiliza lei partidus politiku no krime eleitoral ba lideransa partidus politiku, nune’e iha tempu elisaun hotu-hotu tenke la’o tuir prosedur ne’ebe lei haruka.
Sekretariu Ezekutivu CNE, Komisariu Bernardo Cardoso hatete sensibilizasaun lei ne’e importante tanba lideransa partidus politiku inklui militante sira tenke informadu ho diak kona lala’ok husi lei ne’e.
Tuir nia, asuntu importante ne’ebe mak sira presiza hatene mak kada partidu politiku tenke hetan proponente eleitores hamutuk 2000 no kada munisipiu proponente 1000.
Tanba iha lei anterior, nia hatete proponente iha deit 1500 no kada munisipiu tenke iha proponente 100.
“CNE organiza sensibilizasaun ne’e atu esklarese diak liu tan sobre lei partidus politiku no mos prosesu kadidatura nian,” nia hateten, iha Dili.
Alende ne’e, nia dehan tuir artigu 11-12 lei numeru 2/2016, mensiona katak bandeira no emblema inklui hino partidu nian labele hanesan ho partidu sira seluk.
No tuir lei numeru 2/2016 artigu 3, nia dehan Ministeriu Publiku mak iha kompetensia atu verifika dadus no legalidade dokumentus kada partidus politiku ida.
Iha parte seluk reprezentante Partidu Demokratiku (PD), Rui Menezes hatete informasaun ne’e importante ba partidu politiku sira atu hatene hodi la’o tuir.
“Sira aprezenta regras tuir lei ne’ebe vigor no partidu politiku sira iha dever atu halo tuir,” nia dehan.
