- Publika iha: 18 Janeiro 2024
Iha loron 16 janeiru 2024, Ministra Saúde, Doutora Élia dos Reis Amaral fo posse ba membru Konselho Diretivu Hospital Nasionál Guido Valdares (HNGV) hamutuk nain hat (4) ne’ebé kompostu husi feto nain tolu (3) no mane nain ida (1), signifika agora dadaun feto nain 4 mak kaer kargu diretóra iha hospital nasionál.
Diretóra Servisu Administrasaun Finansas no Logistika, iha HNGV, Sara Maria Xavier hateten konselho diretivu iha posizaun 5 ne’ebé 4 okupa husi feto hanesan Diretóra Ezekutiva Hospital Nasionál Guido Valdares (HNGV), Cecilia Barros Mendonca, Diretora Servisu Administrasaun Finansas no Logistika, Sara Maria Xavier, Diretóra Servisu Asistensia Klinika, Doutora Ana Maria Magno, Diretóra Servisu Enfermagen no Parteira, Maximiliana Ferão no Diretór Apoio Diagnostiku no Terapeutika, Doutor Vidal de Jesus Lopes.
“Agradese ba konfiansa no responsabilidade ne’ebé fo ba hau, hau prontu halao hau nia knar ho diak no responsabilidade iha diresaun servisu administrasaun finansas no logistika iha HNGV,” nia hateten iha servisu fatin Bidau, Dili.
Nia hateten servisu prioridade ne’ebé sei halo mak ezekuta orsamentu jeral estado ne’ebé aloka ba HNGV ho montante 13 milheons resin dolares amerkanu atu mellora sistema baze dadus rekursu umanu no analiza forsa trabalho ne’ebé iha, rehabilitasaun ba edifisiu sira, kompleta ekipamentu medika sira ne’ebé sei falta, promove programa edukasaun formasaun ba profesionais saúde sira no produs uniforma foun ba profesionais saúde sira no pasiente sira.
Nia hatutan tinan ida ne’e planu atu halo rehabilitasaun ba edifisiu ne’ebé administrasaun uza hela sai fali sala emergensia, maternidade no pedatria nian.
Nia informa total rekursu umanu iha HNGV hamutuk na’in 1253, ne’ebé kompostu husi funsionariu públiku permanente hamutuk na’in 910 no kontratadu regular na’in 343.
Iha parte seluk, Ministra Saúde, Doutora Élia dos Reis Amaral husu kargu xefia sira atu hatudu komitmentu no didikasaun tomak servi povu no rai doben ida ne’e ho fuan, liu-liu fornese atendimentu saúde ne’ebé kualidade ba povu tanba konfiansa ne’e hanesan responsabilidade moral ne’ebé povu tula hela ba sira nia kabas.
Nia dehan ohin loron públiku nia matan ba servisu saúde ne’ebe lorloron simu kritika, maibe labele hakiduk tenke ba oin no hatudu públiku hadia problema sira ne’ebé akontese.
“Ba ita bo’ot sira ne’ebe ohin loron simu posse hanesan hau dehan ona katak dezafiu sira ne’e labele hamate no hapara imi nia spiritu servisu no imi nia didikasaun atu hadomi liu tan imi nia knar nudar servidor povu,” nia hateten.
Nia enkoraja servisu nain saúde sira hotu labele dezvaloriza servisu ho kritika sira ne’ebé iha, maibe nafatin halo esforsu halao servisu ho fuan no domin tomak lori kuidadu saúde besik ba povu.