- Publika iha: 29 Maio 2023
Komandante Jerál Polísia Nasionál Timor-Leste (PNTL), Komisáriu Henrique da Costa hatete hein desizaun governu nian hodi halo reforma ba membru polísia na’in 158 ne’ebé mak idade tama ona ba reforma nian.
"Ita hein de’it desizaun husi governu atu bele implementa lei ne'e atu bele halo reforma ba membru na’in 158 ne’ebé naran tama ona iha lista reforma nian," nia dehan.
Nia dehan, komandu haruka ona karta ba Ministériu Interior (MI) atu nune'e bele aselera lalais sira nia desizaun nune'e membru na’in 158 ne'e bele fila ona ba vida sivíl.
Iha parte seluk, Vise-Ministru MI Antonio Armindo hateten, membru PNTL na’in 158 refere deside ona katak reforma iha loron 31 fulan Maiu 2023, ba vida sivíl, hodi bele envolve an iha prosesu seguransa sosiál.
Nia dehan, naturalmente sira-nia lista ne'e, sai tiha ona no publika tiha ona iha Jornal Repúblika, tanba ho eleisaun ne'e maka Ministru no Vise-Ministru MI bá tuir kampaña, maibé iha fulan Maiu obrigatóriu ona para sira bele kompleta sira-nia dokumentu, para haruka ba iha seguransa sosial.
"Ita sei prosesu sira-nia dadus atu bele tama iha sistema seguransa sosial atu nune'e bainhira sira reforma bele hetan subsídiu reforma nian," Vise MI Armindo dehan.
Enkuantu membru ne’ebé mak ofisialmente publika ona iha Jornal Repúblika hamutuk na’in 158 kompostu husi Superintendente Xefe na’in 6, Seperintendente na’in 4, superintendente Assitente na’in 3, Inspetór Xefe na’in 9, Inspetór na’in 11, Inspetór Assistente na’in 4, Sarjentu Xefe na’in 7, Primeiru-sarjentu na’in 18, Sarjentu na’in 6, no Ajente Xefe na’in 90.