- Publika iha: 21 Setembro 2012
Ministru Justisa Deonizio Babo akompanha ho nia Vise Ivo Valente inagura edifisiu foun Ministeriu Publiku (MP) nian iha Distritu Ermera, iha dia 07 Setembru semana ne’e.Tuir Ministru Babo, inagura edifisiu foun MP ne’e hanesan progresu ida iha Prokuradoria nia laran.
“Ne’e diak teb-tebes, ne’e hanesan pilar importante ida husi direitu asesu ba justisa, atu hafasil liu tan komunidade sira hodi bele rezolve sira nia problema tuir dalan justisa no lei, tanba ita hatene katak krime iha Distritu Ermera ne’e as liu iha Timor,” hateten Ministru Babo, (10/09), iha Ermera.
Ministru ne’e dehan, sira sei monta Prokurador no Ofisial de Justisa iha edifisiu MP ne’e atu bele hala’o sira nia knar iha fatin ne’e, no bele responde ba situasaun no kondisaun (krime) ne’ebe maka mosu iha Distritu ne’e.
“Sei tau Prokurador rua ka tolu, no eskrivaun ida ou rua, ofisial de justisa, ho tan Polisia Investigasaun Kriminal maibe ne’e aban bainrua. Agora dadaun ida komesa ona no neneik maka hadia hodi diak liu tan,” Ministru Babo afirma.
Iha lidun seluk Deputadu Mateus de Jesus hateten, ne’e progresu ne’ebe diak, tanba bele hafasil ona komunidade iha parte ne’eba hodi bele resolve sira nia problema ho dalan ne’ebe maka legal.
“Hau hanoin ne’e prosesu no sistema ne’ebe maka kapas tebes, tanba sekuandu la alarga tan knar ne’e ba distritu-distritu, no hamenus knar iha nasional,” Deputadu ne’e apoia.