Komunidade Afaça Aluga Kareta Trek Tula Moras Ba Hospital Baucau

Xefe Suku Afaça iha postu administrativu Quelicai, Munisípiu Baucau, Joaquim Fernandes Ximenes hateten durante ne’e komunidade hasai osan rasik hodi aluga karreta trek hodi tula família ne’ebé moras ba Hospital Regional Baucau atu hetan atendimentu saúde, tanba ambulánsia ne’ebé iha la sufisiente atu kobre ema hotu.

Nia dehan sira iha ona postu saúde ida ho médiku no enfermeiru, ne’ebé fó atendimentu kuidadu saúde primária ba komunidade. Maibé nafatin enfrenta problema falta medikamentu, ekipamentu inklui rekursu umanu.

“Postu Quelicai iha ona postu saúde tolu, maibé laiha transporte atu lori inan sira ba ospitál. Durante ne’e, inan isin rua sira no labarik sira moras ami aluga kareta trek sira mak lori mai iha Baucau,” nia hateten bainhira partisipa iha primeiru enkontru revitalizasaun KONSSANTIL iha salaun City 8 Manleuana, Díli.

Nia hateten postu saúde Afaça mós laiha espasu ida próprio ba inan sira atu partu, tanba ne’e sira didin de’it trepleks ida hodi inan isin-rua sira partu iha laran, maibé fasilidade ne’e mós kondisaun ladun diak ona.

Nia hatutan dadus atual suku Afaça rejista inan isin-rua hamutuk na’in 6, inan fó susu na’in 14 no labarik sira idade tinan lima mai kraik na’in 18.

Nia haktuir kondisaun moris komunidade nian intermus hela fatin barak mak iha ona uma diak no maioria populasaun nu’udar agrikultór, ne’ebé rendimentu lorloron husi atividade faan produtu lokal.

Iha parte seluk, Diretór Jerál, Servisu Nasionál Ambulánsia Emerjénsia no Medika (SNAEM, IP), Horacio Sarmento hateten kareta ambulánsia ne’ebé koloka iha munisípiu Baucau hamutuk tolu, maibé la sufisiente nafatin, tanba númeru populasaun bo’ot.

“Agora dadaun ita haree husi poulasaun kada munisípiu, Baucau ne’e segundu sidade ne’ebé populasaun bo’ot depois Díli. Agora iha ne’ebá ambulánsia tolu, maibé loron ida kazu transfere husi Baucau mai Díli haat to’o hitu, entaun Díli tenke apoia sira,” nia hateten.

Nia hateten total ambulánsia ne’ebé funsiona iha teritóriu tomak hamutuk 25, ne’ebé munisipiu ho populasaun bo’ot ambulánsia tolu, maibé maioria kada munisípiu ambulánsia ida de’it, tanba ne’e la sufisiente.

Nia hatutan orsamentu tinan 2024, sei iha alokasaun orsamentu atu sosa tan ambulánsia hamutuk lima atu bele apoia servisu transferensia moras.