- Publika iha: 19 Outubro 2023
Diretór Kliniku, iha Hospital Nacional Guido Valadares (HNGV), Díli, Doutór Marcelino Correia hateten sira bolu médiku espesialista ba operasaun fuan, operasaun neuro no oncolojia husi Hospitál Siloam Lippo Village, Jakarta, Indonesia hodi fahe esperiénsia klinika no enkoraja médiku espesialista nasionál sira atu hahú halo intervensaun tratamentu ba pasiente sira ne’ebé presiza tulun.
Nia dehan hospitál ne’e iha kooperasaun ho Ministeriu Saúde, tanba durante ne’e iha pasiente barak ne’ebé ho problema fuan no tumor halo tratamentu iha hospitál refere.
“Ohin sira mai ho médiku espesialista na’in tolu mak neuro surgery, cardiothoracic and vascular surgery ka operasaun fuan no oncolojista. Sira na’in tolu mai fahe sira-nia esperiénsia no fó motivasaun ba ita-nia médiku sira, oinsa hala’o operasaun ba kazu sira,” nia hateten hafoin partisipa semináriu fahe esperiénsia klinika iha área kardiolojia, neuro surgery no onkolojia iha HNGV, Bidau, Díli.
Nia hateten Timor-Leste iha ona médiku neuro surgery nasionál ida, ne’ebé foin remata estudu iha China no iha ona médiku onkologista inklui kardiologista, entaun kooperasaun ne’e sei fó espasu ba ekipa médiku sira komunika no konsulta malu atu halo intrevensaun ba kazu sira difisil iha rai-laran.
Nia hatutan Hospitál Siloma manifesta komitmentu atu fó espasu ba médiku nasionál sira atu aprende no foti sub-espesialidade iha sira-nia universidade no prontu akompaña ekipa nasionál halo intervensaun ba kazu difisil sira.
“Ha’u hnanoin importante mak ita hametin kooperasaun ida-ne’e, parte ida ita haruka pasiente ba iha ne’ebá no ita mós bele hetan benefisiu ba kapasitasaun ita-nia médiku sira,” nia hatutan.
Entretantu, Cardiolojista Nasionál, Doutor Herculano Seixas hateten semináriu ne’e ko’alia liu kona-ba guia intervensaun no tratamentu ba moras kankru, tumor no fuan tanba pasiente ne’ebé halo tratamentu iha rai-liur barak liu ho kazu tolu ne’e.
“Husi parte kardiolojia nian, ita bele haree sira-nia kapasidade fó solusaun ba kazu sira ne’ebé ita refere ba di’ak tebes, liu-liu kazu sira ne’ebé presiza operasaun re-vascularizasaun ka bye pass, troka valvula no tumor iha fuan sira halo operasaun ho di’ak tebes no susesu,” nia hateten.
Nia hateten Ministériu Saúde no HNGV bele aproveita kooperasaun ne’e hodi dezenvolve rekursu umanu, liu-liu fó kapasitasaun kona-ba intervensaun kliniku sira, tanba sira hakarak apoia ekipa médiku nasionál.
Iha parte seluk, Head of Ancillary Services and Medical Affairs Division, iha Hospitál Siloam Lippo Village, Dr. Erick Prawira Suhardhi hateten sira-nia prezensa iha Timor-Leste atu hametin kooperasaun ho ekipa médiku jerál no espesialista nasionál ho objetivu atu promove seguransa pasiente.
“Futuru mai Hospitál Siloam bele iha kooperasaun ne’ebé di’ak ho governu Timor-Leste, atu médiku sira ne’ebé presiza halo konsultasaun ba kazu sira ne’ebé difisil bele kontatu ami no ami bele ajuda,” nia hateten.
Nia hateten agora dadaun pasiente Timoroan na’in neen mak halo hela tratamentu intensivu iha Hospitál Siloam Lippo Village, sira-ne’e ho moras tumor no fuan.
Nia hatutan sira fornese tratamentu komprensivu tebes ba pasiente sira husi Timor-Leste no koloka médiku espesialista sira ne’ebé senior iha sira-nia área hodi atende pasiente sira husi Timor-Leste, tanba atu asegura pasiente sira nia seguransa no sira bele fila ho kondisaun saúde di’ak.