Quinta, Junho 13, 2024
Total visitors: 766366

Ministra Reinu Unidu ba Indo-Pasífiku, Anne Marie-Trevelyan, anunsia oferese fundu ho montante millaun £1 ba Timor-Leste, liu husi ajénsia Fundu Nasoens Unidas Ba Labarik (UNICEF) nia programa saúde hodi kombate malnutrisaun ba labarik idade tinan lima mai kraik.

Ministra Reinu Unidu ba Indo-Pasífiku, Anne Marie-Trevelyan, anunsia oferese fundu ho montante millaun £1 ba Timor-Leste, liu husi ajénsia Fundu Nasoens Unidas Ba Labarik (UNICEF) nia programa saúde hodi kombate malnutrisaun ba labarik idade tinan lima mai kraik.

Ministra dehan, Timor-Leste halo progressu signifikante tebes iha setór saúde tanba konsege redus taxa mortalidade inan, re-estabelese sistema saúde hodi hasa’e prestasaun atendimentu saúde ba populasaun sira no dezenvolvimentu rekurus umanu iha setór saúde. Maibe malnutrisaun sei sai dezafiu signifikante ba nasaun ida ne’e tanba ne’e governu Reinu Unidu apoia prioridade governu nian kombate malnutrisaun.

“Hau hatene malnutrisaun sei sai dezafiu ne’ebé signifikante tebes ba Timor-Leste, maibe kontente rona governu nia komitmentu ne’ebé bo’ot tebes atu kombate malnutrisaun,”

“Fundu husi governu Reinu Unidu ne’e sei premite atu apoia habelar papel grupo suporta inan nian iha munisípiu sira atu promove prevensaun no tratamentu ba malnutrisaun, ami kontente suporta servisu sira ne’e,” nia hateten hafoin halo enkontru no asina akordu koperasaun entre governu Reinu Unidu-Governu Timor-Leste ho UNICEF, iha Palasio Sinzas Kaikoli, Dili.

Nia hateten intervensaun nutrisaun baze ba komunidade ne’e iha vantajen bo’ot, liu-liu hasa’e koñesementu no abilidade familia nian atu fo prioridade ba oan sira nia moris ne’ebé saúdavel.

Entertantu, Ministra Saúde, Elia dos Reis Amaral hato’o agradesementu ba governu Reinu Unidu, ne’ebé afirma komitmentu atu apoia setór saúde, liu-liu esforsu governu nian kombate malnutrisaun iha rai laran.

“Ita agradese tebes tanba governu Reinu Unidu mai visita ita nia rai no sira asian akordu ida ho ita nia governu atu halo koperasaun diak laos ba malnutrisaun deit, maibe buat barak hodi lori moris diak ba ita nia ema sira, liu-liu labarik sira idade tinan lima mai kraik,” nia hateten.

Tuir dadus Peskiza Aihan no Nutrisaun tinan 2020, hatudu labarik idade tinan lima mai kraik 47% sofre malnutrisaun raes badak, 8,6% sofre krekas, 32% todan menus no 63% sofre anemia.

Iha parte seluk, Reprejentante UNICEF iha Timor-Leste, Bilal Durrani hateten intervensaun baze iha komunidade importante tebes atu mobiliza familia no komunidade sira komprende problema malnutrisaun, atu sira bele partisipa ativu iha edukasaun prevensaun no identifikasaun ba labarik sira ne’ebe sofre malnutrisaun atu halo referral ba fasilidade saúde hodi hetan tratamentu.

Nia dehan koperasaun ne’e pertenente tebes ba sira atu haforsa koñesementu no kapasidade komunidade nian konaba pratika fo hahan ba labarik sira idade fulan 0 até 23, atu prevene malnutrisaun todan menus.

“Hanesan ita hotu hatene kategoria grupo idade ida ne’e tama iha janela oportunidade kritiku 1.000 dias ba dezenvolvimentu no kresimentu labarik ida nian. Intervensaun ne’ebé halao baze ba komunidade prova ona katak prevene no redus malnutrisaun globalmente no iha Timor-Leste. Tanba ne’e ami espera hasa’e kobertura no intensidade servisu sei kontribui ne’ebé signifikante tebes ba esforsu kombate malnutrisaun,” nia hateten.

Nia informa UNICEF no Ministeriu Saúde fo ona formasaun no kapasitasaun ba voluntariu grupo suporta inan hamutuk nain 6,100, hodi halao servisu importante sira iha nivel komunidade.