- Publika iha: 30 Junho 2023
Diretór Geral, iha Sekretária Estadu Formasaun Profisionál no Empregu (SEFOPE), Paulo Alves informa sira halo ona selesaun final ba joven hamutuk na’in 12 kompostu husi feto na’in-neen (6) no mane na’in-neen 6 atu ba servisu iha setór agrikultura iha nasaun Japaun.
Nia dehan joven sira-ne’e mai husi munisípiu Aileu na’in-rua, Ainaro na’in-ida, Baucau na’in-tolu, Covalima na’in-tolu, Díli na’in-ida, Ermera na’in-ida, Lautem na’in-ida. No durante ne’e sira tuir ona formasaun língua Japaun iha sentru formasaun Mirai Sato Suai, Quesadhip Ruak, Santa Rafaela Bebonuk no Young Men’s Christian Association (YMCA).
“Ohin ita halo enkontru ho sira na’in 12, ne’ebé ita selesionadu ona atu ba Japaun ho embaxadór Timor-Leste nian iha Japaun atu briefing deit alin sira tanba iha tempu ida ita sei konvida embaxadór Japaun iha Timor-Leste, halo serimónia despedida ba sira,” nia hateten hafoin halo enkontru ho kandidatu traballadór na’in 12 iha edifísiu SEFOPE Kaikoli, Díli.
Nia hateten joven sira-ne’e asina ona kontratu no dokumentu sira preparadu hotu ona, agora hein deit billete mai sira aranka ona ba Japaun.
Nia hatutan sira-na’in 12 ne’e pilotu ba mobilidade laboral Japaun nian, ne’ebé sei servisu hotu iha setór agrikultura nian.
Iha parte seluk, Kandidata Traballadór ba Pilotu Mobilidade Laboral Japaun, Maria Correia agradese ba SEFOPE no governu Japaun ne’ebé fó ona oportunidade ba timoroan sira servisu iha Japaun.
“Kona-ba língua ha’u sente difisil oituan tanba língua Japaun iha alfabetu tolu mak Hiragana, Katakana no Kanji tenke estuda kona-ba sira-ne’e. Ami na’in 12 ne’ebé sei aranka ba Japaun ne’e, ami halo esforsu no vontade duni aprende língua maské difisil,” nia hateten.
Nia hateten bazeia ba kontratu ne’ebé sira asina ho kompañia durasaun tempu servisu iha Japaun tinan tolu. No servisu iha área agrikultura, entaun espera sira sei aprende buat barak relasiona ho dezenvolvimentu setór agrikultura iha rai Japaun, ne’ebé koñesidu liu ho introdusaun teknolojia avansadu sira.