Sexta, Março 01, 2024
Total visitors: 760811

Ofisial Advokasia, iha Organizasaun Fundasaun Alola (FA), Paulina Asis Belo hateten sosializasaun informasaun konaba krime trafiku umanu ba komunidade seidauk maximu tanba ne’e sidadaun, liu-liu joven sira barak vitima ba manobra trafikante nian.

Ofisial Advokasia, iha Organizasaun Fundasaun Alola (FA), Paulina Asis Belo hateten sosializasaun informasaun konaba krime trafiku umanu ba komunidade seidauk maximu.

Nia dehan iha kazu balun ne’ebé konsegue sai husi Timor hanesan sira ne’ebé iha Portugal, Malasia no Dubai. Maibe iha balun mos la konsegue tanba autoridade seguransa deteta sedu.

“Hau hanoin seidauk maximu tanba ami hanesan sosiedade sivil dalabarak depende ba doador sira nia apoia hodi halao sosializasaun ba komunidade atu hasa’e sira nia koñesementu konaba krime ida ne’e,” nia hateten iha servisu fatin Maskarinhas, Dili.

Nia hateten autoridade lokal no lideransa komunitaria sira tenke ativu habelar informasaun konaba trafiku umanu ba komunidade sira iha area rural, liu-liu joven sira atu bele alerta ba oportunidade servisu sira iha rai liur.

Nia mos husu ba autoridade seguransa sira atu halo esforsu buka tuir rede trafikante ema nian tantu iha rai laran no rai liur.

Nia hatutan sira prontu kolabora ho governu no parseiru dezenvolvimentu atu sosializa lei prevensaun no luta kontra trafiku umanu, lei nu. 3/2017, 25 de janeiru ba komunidade sira atu bele iha koñesementu no intende krime ida ne’e, nune’e ema hotu-hotu bele alerta.

Iha parte seluk, Presidente Konfederasaun Sindikatu Timor-Leste (KSTL), Almério Vila Nova hateten kondisaun moris ne’ebé difisil intermus ekonomikamente no laiha informasaun ne’ebé proprio konaba trafiku umanu halo ema sai vulneravel liu tan involve no vitima ba krime trafiku umanu.

Nia dehan sidadaun sira ne’ebé rekruta servisu iha rai laran hetan esploitasaun, diskriminasaun, salariu la tuir lei, ne’e mos konsidera trafiku umanu tanba ne’e laos deit sira ne’ebé ba rai liur.

“Governu liu husi servisu imigrasaun nian hamutuk ho agensia International Labour Organization (ILO) no International Organization for Migration (IOM) importante tebes atu sosializa informasaun trafiku umanu ba komunidade iha area rural labele konsentra deit iha Dili,” nia hateten.

Nia hateten autoridade seguransa sira, liu-liu parte imigrasaun, fronteira sira no polisiamentu komunitaria tenke sensibiliza lei trafiku umanu ba iha suku sira.