- Publika iha: 10 Janeiro 2024
Komandante Polisia Nasionál Timor-Leste (PNTL), Munisípiu Dili, Superintendente Xefe Polisia Orlando Gomes, informa iha loron 7 fulan-janeiru 2024, simu keixa husi komunidade ne’ebé hetan ataka husi ema moras mental iha fatin públiku.
Nia dehan depois simu informasaun sira halo kedas kapturasaun ba sidadaun ne’e lori ba eskuadra submete ba prosesu identifikasaun no investigasaun. Maibe sidadun ne’e ho kondisaun moras mental, entau la halo detensaun enkaminha ba hospital no Organizasaun Psychosocial Recovery and Development in East Timor (PRADET) atu halo ezaminasaun ba nia kondisaun mental.
“Ita hare iha Dili laran ne’e, ema moras mental ne’ebé durante ne’e halo problema ne’e iha rua. Ida mak iha Embaixada Portugal nian ne’e, ita halo kapturasaun lori mai eskuadra Vera Cruz halo prosesu investigasaun no ida seluk iha parte Embaixada Amerika nia oin ne’e polisia eskuadra Dom Aleixo halo kapturasaun. Maibe tanba ema ne’e moras mental ita la hatama nia ba sela, ita haruka ba hospital no PRADET atu hare ema ne’e nia kondisaun,” nia hateten iha servisu fatin Kaikoli, Dili.
Nia hateten kazu agresaun ne’e la rezulta ema kanek, maibe kareta hetan estragus tanba uza besik baku rahun vidru parte kotuk.
Nia haktuir kazu sira ne’e sai referensia ba governu bele kria infrastrutura ne’ebé proprio hodi bele akumula sidadaun sira ne’ebé ho problema mental, liu-liu sira ne’ebé fo ameasa ba aan rasik no komunidade.
Entretantu, Kordenador Programa Asistensia Moras Mental, iha PRADET, Nicolau Vicente Ximenes hateten seidauk hetan kontaktu husi parte PNTL konaba ema moras mental ne’ebé ataka komunidade. Maibe durante ne’e sira iha koperasaun servisu ne’ebé diak ho parte PNTL atu hare ba kazu sira ne’ebé involve ema moras mental.
“Dala barak liu sira hetan informasaun sira komunika ho PRADET, hanesan komunidade sira informa konaba kazu mental ka sira hetan iha dalan ibun, sira lori ba eskuadra no fo informasaun ba ami hare,” nia hateten.
Nia hateten numeru ema moras mental iha dalan ibun, liu-liu iha sidade Dili laran barak no iha balun ne’ebé agresivu fo ameasa baa an rasik no ataka komunidade sira tanba ne’e importante tebes atu governu kria fasilidade proprio hodi akumula ema sira ne’ebé ho moras mental.