PDHJ Kondena Oknum PNTL ho F-FDTL Baku no Tiru Sidadaun Sivíl

Provedór Direitu Humanu no Justisa (PDHJ), Virgílio da Silva Guterres lamenta no kondena makas aktu oknum Polísia Nasionál Timor-Leste (PNTL) no Falintil-Forsa Defeza Timor-Leste (F-FDTL) ne’ebé halo agresaun fisiku, liu-liu baku no tiru hasoru sidadaun sivíl sira.

Nia dehan kazu rua ne’ebé sai preokupasaun bo’ot mak kazu oknum PNTL ne’ebé tiru joven ida iha Munisípiu Viqueque iha loron 12 fulan-dezembru, tanba envolve iha konfrontu no kazu seluk oknum F-FDTL ne’ebé baku joven balun iha kampu tebe bola iha loron 16 fulan-dezembru ne’e.

“Provedória direitu humanu lamenta tebes ho akontesimentu rua ne’ebé aparellu estadu nian importante polísia ho militár halo. Provedór kondena atuasaun sira hanesan ne’e, tanba ita haree atuasaun sira-ne’e ses husi kódigu profesionál militár no polísia nian,” nia hateten liuhusi konferénsia imprensa iha edifisiu PDHJ Kaikoli, Díli.

Nia hateten sira simu keixa no rona ona deklarasaun husi joven sira ne’ebé sai vítima ba intervensaun oknum F-FDTL, tanba ne’e sira sei halo investigasaun hodi identifika abuzu poder ne’ebé mosu.

Nia hatutan sira enkoraja joven sira-ne’e atu hato’o keixa ba Ministériu Públiku atu halo investigasaun no fó garantia ba joven sira, rezultadu investigasaun sei la hetan intervensaun militár nian.

Iha oportunidade ne’e, Provedór husu ba komandu PNTL no F-FDTL atu halo inkeritu ne’ebé rigór hodi bele identifika autór sira atu bele responsabiliza tantu kriminál no institusionál.

“Konstitusaun garante ezisténsia polísia no militár nian ne’e atu defende povu la’ós atu halo agresaun fisiku ba populasaun,” nia haktuir.

Iha parte seluk, Ministru Interior, Francisco da Costa Guterres hateten iha prosedimentu ne’ebé guia PNTL sira atu halo atuasaun, entaun presiza halo investigasaun klean hodi analiza asaun ne’ebé oknum ne’e halo viola prosedimentu ou lae.

“Se nia la kumpri regra ne’ebé iha, entaun hakarak lakohi tenke hetan sansaun. Maibé se nia kumpri hasai tiru ne’e atu salva guarda ba defeza sira-nia aan, tanba kuandu la tiru bele afeta sira nia seguransa rasik, ne’e ita tenke haree prosedimentu sira,” nia hateten.

Nia hateten relatóriu pre-elemináriu iha ona, maibé presiza haree klean, tanba ne’e komandu halo hela investigasaun.