- Publika iha: 02 Fevereiro 2016
Ministru Negosio Estrangeirus e Kooperasaun (MNEK), Hernani Coelho, hateten numeru feto tuur iha kargu embaixadora tinan ida ne’e aumenta, tanba feto iha kapasidade no komitmentu atu servi estado.
Nia dehan, Timor oan hotu (feto no mane) iha direitu atu asumi kargu embaixador/a, reprezenta estado Timor –Leste iha nasaun seluk, laiha rekezitus espesifiku, importante iha kapasidade no komitmentu atu servisu estado.
“Ami la haree ba iha seksu, koor, importante mak Timor oan ne’ebe iha espiritu nationalismu forte, iha kapasidade no komitmentu atu servi estado,” Ministru Coelho hateten, iha Parlamentu Nasional.
Maske numeru feto iha diplomata sei ki’ik, maibe nia hateten, promove dadaun ona iha embaixada Timor –Leste iha nasaun lubuk ida mak feto, hanesan embaixadora Timor –Leste iha Portugal, America, Singapura, Cambodia no Korea do Sul.
Iha parte seluk reprezentante feto iha Parlamentu Nasional, Deputada Josefa Alvares Pereirra Soares, hateten la fasil ba ema ida atu tuur reprezenta estado iha international.
Nia mos husu ba feto maluk sira, atu prepara an nafatin liu –liu iha konesementu nivel international, tanba oportunidade sira ne’e sei barak ba feto sira atu preense fatin sira ne’e.
“Tenke prepara an iha buat hotu, la’os matenek deit, iha konesementu internasionalmente inklui mos lingua,” nia enkoraja.
Nia rekonese, katak promosaun igualdade jeneru iha Timor –Leste iha progresu bo’ot tebes, tanba presentazen feto iha parlamentu, governu, diplomata komesa aumenta ba beibeik.