Partisipasaun Feto Iha Vida Militar Foin 9%

Brigadeiru Jeneral Falintil Forsa Defeza Timor –Leste (F-FDTL), Filomeno Paixao, hateten dadaun ne’e partisipasaun feto iha vida militar atinji ona 9%  (228 feto) no sei aumenta tanba oportunidade nakloke ba ema hotu atu tama militar.

Nia dehan, iha instituisaun F-FDTL laiha diskriminasaun, tratamentu ba feto no mane hanesan deit intermus kapasitasaun, promosaun inklui mos operasaun. 

“Ita iha 9% feto nia partisipasaun iha F-FDTL, ita espera katak numeru ne’e bele sa’e, tanba adminsitrasaun ne’e presiza liu feto,” Brigadeiru Paixao hateten, iha salaun Ministerio Defeza, Fatuhada, Dili. 

Nia rekonese, katak iha forsa feto ida rua mak la aguenta ho vida militar, mais maioria brani tebes tanba sira balun hola parte iha operasaun ba hela iha ailaran, lori kareta hikon no pilotu, ne’e signifika feto bele no feto nia kontribuisaun importante ba instituisaun.

Tanba ne’e, nia enkoraja feto sira atu nafatin buka kapasita aan hodi bele kaer mos kargu sira foti desizaun nian hanesan koronel, tanba feto nia kontribuisaun importante tebes iha dezenvolvimentu instituisaun F-FDTL. 

Entretantu Ministru Defeza, Cirilo Cristovao, hateten iha instituisaun F-FDTL susar oituan atu tau quota, tanba karakter servisu ida ne’e liu –liu formasaun todan, maibe iha Asia Sudestiku partisipasaun feto iha vida militar, Timor Leste aas liu kompara ho nasaun seluk. 

“Susar oituan, tanba natureza servisu ne’e todan, dala ruma iha rekrutamentu feto barak, maibe iha formasaun feto balun mak la aguenta,” nia dehan. 

Nia mos promote, sei fo prioridade ba feto sira atu tama iha academia militar iha estrangeirus no promove feto sira iha forsa especial, tanba numeru feto iha forsa especial sei limitado tebes. 

Tuir dadus total membru F-FDTL ne’ebe agora dadaun ativu hamutuk nain 2257, husi numeru ne’e feto nain 228 no tuur iha kargu hanesan oficiais nain 6, primeiru sargentu nain ida, segundu sargentu nain 48, kabu nain 29 no soldadu nain 144. 

Iha parte seluk, Sekretario Estado Apoiu Promosaun Sosio Ekonomia (SEM), Veneranda Lemos Martins, rekonese katak instituisaun militar susar atu tau quota, tanba todan maibe importante nune’e feto sira iha liur bele tama iha vida militar. 

“Forsa la’os mane deit, maibe feto mos tanba ita nia luta hatudu ona feto nia partisipasaun importante mos, agora ita hetan independesia ona, ita hakarak feto mos iha pozisaun sira, liu –liu foti desizaun,” nia hateten. 

Tanba ne’e, nia dehan, SEM servisu hamutuk ho UN Women fo kapasitasaun ba feto lideransa sira iha instituisaun hotu inklui militar nian kona ba lideransa, public speaking no lingua hodi prepara sira ba iha pozisaun lideransa nian.