- Publika iha: 05 Novembro 2015
Diretora organizasaun Asistensia Legal ba Feto no Labarik (ALFeLa), Merita Correia, hateten sira prepara ona advogadu nain lima hodi akompanha vitima Violensia Bazeia ba Jeneru (VBJ) sira iha tribunal.
Nia dehan, advogadu Timor oan nain lima ne’e remata kursu judicial nian iha Sentru Formasaun Juridiku (SFJ) e agora koloka ona ba iha tribunal municipal tolu (Dili, Baucau, Suai) hodi akompanha no defende vitima sira iha tribunal.
“Ami iha ona advogado nain lima ne’ebe hetan ona kualifikasaun husi sentru formasaun juridical ne’ebe ami koloka ona ba iha tribunal Suai, Baucau no Dili,” Diretora AlFeLa Correia hateten, iha servisu fatin, Vila Verde, Dili.
Nia hatutan, sira sei esforsu atu dezenvolve kapasidade institusional no rekursus humanus atu bele fo atendimentu ne’ebe diak ba vitima sira, liu –liu ajuda feto no labarik sira asesu ba sistema justisa formal.
Durante tinan 2014, nia dehan, AlFeLa fo ona asistensia legal ba vitima violensia bazeia ba jeneru hamutuk 513, maioria krime violensia domestika no insestu.
Entretantu Membru Grupo Feto Parlamentar (GFPTL), Deputada Josefa Alvares Pereira Soares, espera ho advogadu Timor oan ne’ebe organizasaun prepara bele defende vitima sira iha tribunal hodi hetan lia los no justisa ne’ebe justu ba sira.
“Iha advogadu rasik ne’e diak liu tan, nune’e bele ajuda vitimas halo keixa no defende sira iha tribunal,” Deputada Soares hateten.
Tanba ne’e, nia mos husu ba governu presiza haforsa servisu organizasaun non governmental sira hodi fo asistensia legal ne’ebe diak no efetivu ba feto no labarik vulneravel sira ne’ebe sai vitima ba violensia sira.