- Publika iha: 11 Março 2015
Diretora organizasaun Feto iha Politika Caucus, Paula Corte Real, hateten feto intelektual husi munisipal Dili, Ermera no Liquisa hamutuk nain 54 mak deklara an prontu atu kompete ho mane iha eleisaun sukus tinan ne’e.
Nia dehan, Caucus kontinua prepara no motiva feto sira atu kompete iha pozisaun foti desizaun iha nivel nasional to’o ba nivel lokal.
“Ami identifika ona 54 feto mak deklara pronto atu sai kandidatu ba iha eleisaun xefe sukus agora,” Diretora Caucus Corte Real hateten, iha nia knar fatin Kaikoli, Dili.
Alende ne’e nia dehan, mos fo formasaun kapasitasaun ba iha feto kandidatu sira kona ba jestaun lideransa hanesan halo proposta, kontrolu orsamentu, mekanismu monitorizasaun ba projetu no seluk tan, hanesan baze fundamental hodi dezenvolve sira nia sukus.
Nia hateten, partisipasaun feto iha vida politika nivel nasional atinji ona 38% kompara ho nivel local ne’ebe foin 2% deit, tanba ne’e presiza atu prepara no enkoraja feto sira atu partisipa iha nivel local mos.
Iha parte seluk, Prezidente Asosiasaun Feto Munisipal Ermera, Maria Exposto, hateten sira identifika ona feto intelektual hamutuk nain 15 husi 52 sukus iha munisipiu ne’e mak preparadu atu kompete iha eleisaun sukus.
Maibe, nia dehan, presiza kapasitasaun atu eleva sira nia konesementu hodi halo dezenvolvementu ba iha suku laran, bainhira hetan fiar husi povu.
“Ami presiza los kapasitasaun ba ami nia feto maluk sira ne’ebe ami identifikaona atu kandidata an ba iha xefe sukus no xefe aldeia iha eleisaun sukus 2015 ne’e,” Exposto hateten.