Embaixada Australia Organiza Diskusaun Publiku Kona ba Igualdade

Embaixada Australia iha Timor –Leste organiza diskusaun publiku kona ba dezenvolvementu igualdade jeneru iha Timor –Leste.

Reprejentante Embaixador Australia, Sally Moyle, hateten diskusaun ne’e ho objetivu atu selebra loron nasional feto Timor –Leste ne’ebe monu iha dia 3 Novembru hanesan meius rekonesementu ba konstribuisaun feto iha luta ba libertasaun. 

Moyle hateten, problema disigualidade ne’e la’os deit iha Timor –Leste, iha mundu tomak, maibe Timor –Leste iha progresu bo’ot ba promosaun igualidade jeneru.  

“Timor –Leste iha progresu ne’ebe bo’ot kompara tinan hirak liu ba, maibe iha buat barak mak presiza halo atu hadiak liu tan,” Moyle hateten, iha salaun Auditorium UNTL, Liceu, Dili. 

Tanba ne’e, nia husu ba governu no sosiedade hotu tenke servisu hamutuk iha parte hot-hotu kona ba violensia domestika, emansipasaun feto no fo dalan ba feto sira atu sai lideransa iha nasaun ida ne’e. 

Iha fatin hanesan, feto rejistensia, Olandia Cairo, hateten durante tinan 15 ikus ne’e partisipasaun feto Timor-Leste iha prosesu dezenvolvementu hetan progresu bo’ot tebes.

“Ita haree iha parlamentu, governu numeru feto bo’ot, iha universidade estudante feto barak, ita mos haree feto matenek barak iha area rural, feto sira komesa forte tanba sira hakarak luta hodi tuur iha posisaun sira iha nivel distrital,” Cairo hateten.

Maske nune’e, nia enkoraja nafatin feto sira atu labele dezafia an, kontinua prepara an no hatudu ba ema hotu, katak tuur iha posizaun importante ida, tanba iha kapasidade no matenek. 

Nia hatutan feto hotu tenke orgulho ho progresu ne’ebe iha no kontinua esforsu nafatin atu hadia parte balun ne’ebe sei susar hela hanesan seitor saude mortalidade infantile no inan sei as, edukasaun alfabetizasaun no seluk tan. 

Entertantu, Asistensia Legal Ba Feto no Labarik (ALFeLa), Merita Correia hateten iha parte justisa mos iha progresu bo’ot tanba iha kazu violensia domestika barak mak asesu ona ba iha justisa formal kompra ho tinan hirak liu ba.

“Iha tinan 2004-2010 feto ladun asesu ba justisa formal maibe ho esforsu ne’ebe governu no intidade hotu halo ami atinji misaun ne’ebe ami iha katak numeru asesu feto ba justisa formal komesa as,” Dehan Correia 

Nia hatutan iha progresu ona maibe iha parte balun presiza fo atensaun diak liu tan liu –liu kazu espesifiku sira hanesan insestu no prosesu julgamentu ne’ebe sei kleur.