- Publika iha: 05 Agosto 2013
Membru Komisaun F (edukasaun, saude, veteranus no igualidade jeneru) sira desloka ba iha Portugal, hodi hare no rona direitamente preokupasaun estudantes Timor oan iha ne’eba, e iha ne’e estudante sira preokupa liu kona ba subsidiu husi governu ne’ebe sempre tarde.
Deputadu Leonel Marcal ne’ebe halo parte iha vizita ne’e hateten, estudante bolseiru sira preokupa liu kona ba subsisiu ne’e, tanba vida moris iha Portugal karuun los (biaya kehidupan mahal).
“Osan bolsu estudu nian to’o iha ne’eba tarde, sira barak mak labele tuir ezame, tanba sira seidauk selu sira nia eskola,” Deputadu Marcal dehan, hafoin fila husi Portugal, iha Parlamentu Nasional.
Nia dehan, subsidiu ba tinan ida ne’e to’o seidauk to’o iha sira no nia konsekuensia mak selu osan eskola tarde.
Deputadu ne’e afirma, problema ne’e akontese ba estudantes sira ne’ebe hasai estudu iha Universidade Lisboa, Braga no Coimbra.
Entretantu Deputadu Eduardo Barreto, katak iha vizita ne’e la’os deit hare kondisaun estudante sira, maibe mos vizita Asembleia da Republika Area Edukasaun,Saude no Jeneru ninian iha Portugal.
“Depois ami sai husi Portugal, mai fali iha Indonezia hare estudante sira ne’ebe mak namkari iha Indonezia, ne’ebe mak hamosu violensia iha ne’eba,” Deputadu Barreto informa.
Iha fatin hanesan Deputada Bendita Moniz Magno, dehan estudantes balun besik fila ona mai Timor, tanba besik remata ona sira nia estudus, balun ba iha tinan 2008, 2009 no 2012 nian.
“Ami ba atu hare deit, la’os atu foti desizaun, orgaun ezekutivu mak foti desizaun tomak,” Deputada Magno katak.
Tanba ne’e nia hatutan, iha tempu badak Komisaun F sei hato’o relatoriu vizita ne’e ba iha ministeriu kompetente, hodi hare preokupasaun hirak ne’e.