- Publika iha: 31 Julho 2013
Diretora Organizasaun Caucus, Julieta Ferreira hateten, sira nia parte sei organiza kadi kakutak (cerdas cermat-Indo) kona ba asuntu igualidade jeneru ba estudantes iha Eskola Ensino Sekundaria iha Dili laran.
Diretora ne’e dehan, atividade ida ne’e hanesan parte ida atu komemora loron nasional feto ne’ebe monu iha dia 03 Novembru kada tinan, e mos atu hatene tuir estudantes nia konesementu kona ba asuntu ida ne’e to’o ne’ebe?.
“E mos hanesan edukasaun sivika ida ba sira, atu sira hatene partisipasaun feto iha luta independensia, tanba durante ne’e estudante sira iha eskola hetan materia geral deit, espesifiku ba feto ne’e sira la hatene,” Diretora Fereira hateten, iha Mascarenhas, Dili.
Material ne’ebe sei fo iha kadi kakutak ne’e, nia dehan, alem de materia geral iha mos material espesifiku ba feto, hanesan lideransa feto, lei ne’ebe promove direitu feto, loron nasional no internasional ba feto inklui mos heroina sira.
Diretora Ferreira afirma, atividade ne’e sei realize iha fulan Outubru tinan ne’e, no USAID Jakarta-Indonezia mak sai supporter ba eventu ne’e.
Entretantu Alcinda Pinto, estudante husi eskola Ensino Sekundaria FINANTIL ne’e apresia inisiativa ida ne’e, nune’e bele aumenta sira nia konesementu kona ba asuntu igualidade jeneru.
“Ne’e importante tebes, tanba alem de tuir kompetisaun ne’e, ami mos bele hatene no iha konesementu kona ba programa promove igualidade jeneru iha rai laran,” estudante Pinto dehan.
Iha parte seluk, Prezidente Grupu Mulher Parlamentar (GMPTL), Deputada Josefa Alvares Soares konkorda ho inisiativa ida ne’e, ho nune’e bele hasa’e komprensaun estudante sira nian kona ba kontestu igualidade jeneru ne’ebe sai mos programa prioridade iha governasaun ida ne’e.
Nia dehan, atu ema hotu tau improtansia ba igualidade jeneru, ne’ebe tama mos planu Milenium Development Goals (MDG’s), importante mak integra iha kurikulum ensino nian, se la’e susar atu ema,liu-liu professor sira komprende.
“Ne’e hanoin ne’ebe diak, atu estudantes sira komprende kona ba konseitu igualidade jeneru, maibe parte ida ita tenke hare mak kurikulum do ensino integra buat ruma koalia kona ba igualidade jeneru,” Deputada Soares sujere.