- Publika iha: 29 Julho 2013
Polisia Tranzitu Nasional Timor-Leste sosializa lei no regras tranzitu nian ba iha estudantes iha Ensino Sekundaria sira iha capital Dili.
Komandante Tranzitu Nasional (POLTRANS), Inspektor Xefe Antonio L.C. Soares hateten, aitividade ne’e hala’o ho objetivu atu fo konesementu ba estudante sira, tanba dala barak estudante sira mak viola regras tranzitu nian no involve iha asidente trafiku.
“Hanesan laiha karta kondusaun, la kumpri sinais tranzitu, halo tarikan no halai motor iha kurva ne’e ho volume ne’ebe maka’as, ho ida ne’e mak ami tenke fo konesementu ba sira atu nune’e sira bele kuidadu an,” Komandante Soares dehan, iha Kaikoli, Dili.
Nia hatutan, sira mos fo konesementu kona ba lei no regulamentu kodigu Estrada inklui investigasaun no lejislasaun nian ba sira.
Komandante ne’e afirma, sosializasaun ne’e halo iha Eskola Sekundaria Sao Pedro, Sao Miguel, Eskola A’anur, Kristal , 10 Dezembru no seluk tan, no estudantes sira partisipa ho antuziasmu tanba sira mos hakarak hatene.
Hafoin Eskola Sekundaria remata, nia dehan, sira sei halo fali treinamentu hanesan ba estudantes iha Eskola Pre- sekundaria sira iha Dili laran.
Entretantu Estudante Sao Miguel, Francisca Fernandes hateten, ne’e importante tebes tanba bele aumenta sira nia konesementu.
“Diak tebes no primeira ves hau tuir, ne’ebe hau hanoin importante tebes, tanba hau rasik lori motor no presiza hatene informasaun kona ba tranzitu nian,” Estudante Fernandes dehan.
Iha fatin seluk Deputada Maria Rosa da Camara, apoia tebes inisiativa ida ne’e, tanba bele ajuda ona fo konesementu ba estudante sira.
“Ne’e diak tebes, atu nune’e estudante sira mos hatene lei no regras tranzitu nian, maibe se bele hala’o mos ba estudante sira iha distritus,” Deputada Camara sujere.