- Publika iha: 22 Julho 2013
Estudantes Fakuldade Medisina Universidade Nasional Timor Lorosa’e lamentavel ho kondisaun sira nia laboratorium ne’ebe iha tanba bainhira udan, bee nakonu iha uma laran.
Estudante Natalina Soares dehan, maske la empede ba sira nia pratika, maibe kondisaun sala laran ne’e la favoravel no foin uja fulan tolu hafoin rehabilita.
“Atu halo laboratorium ne’e tenke iha planu diak, tenke halo ho kualidade, agora ida ne’e foin uja fulan tolu deit bee tama sala laran nalihun tiha,” preokupa Estudante Soares, iha kampus UNTL, Dili.
Tuir nia, ida ne’e akontese tanba badae’n sira taka bosok deit ho triplek, entaun bainhira udan been kona ba, dodok no bee tama ba sala laran.
Estudante ne’e mos husu ba parte universidade, atu tau atensaun ba kestaun ne’e, tanba se la’e ekipamentus ne’ebe uja ba pratika, bele at hotu.
Entretantu Responsavél Laboratorium, Elisa de Jesus, rekonese katak sala laboratorium udan been tama tanba laiha kualidade.
“Plafon sira ne’e kuak hotu ona, kuandu udan ona bee nalihun iha sala laran no ida ne’e bele estraga sasan ne’ebe estudantes, liu-liu parteira sira uja pratika bele at,” Responsavel ne’e dehan.
La’os ne’e deit, nia hatutan, laboratorium ne’e mos ahi la lakan no Air Condition (AC) mos laiha e pior liu tan agora bee tama halo nalihun iha laran.