- Publika iha: 18 Julho 2013
Estudantes Fakuldade Engenaria Siénsia no Teknolojia (FEST) Universidade Nasional Timor Lorosa’e preokupa no lamenta tanba sira nia dormitoriu iha Hera to’o agora la funsiona, enkuantu parte universidade hela deit promesas ba estudante sira.
Senadu Fakuldade Engenaria, Alexandrinho Gomes hateten, prosesu rehabilitasaun ba dormitoriu ne’e hahu kedas iha tinan 2009 maibe to’o agora seidauk bele utilize.
“Universidade halo komprimisu katak, iha Janeiru tinan ne’e bele uja ona, maibe realidade to’o agora laiha, fasilidades iha laran tama hotu ona,ami la hatene tanba saida,” preokupa Senadu Fakuldade Engenaria, Gomes, iha Kampus, Dili.
Tuir nia, ida ne’e akontese tanba parte universidade Nasional Timor Lorosa’e (UNTL), laiha planu ne’ebe diak.
Estudantes FEST sente preokupadu tanba durante ne’e sira sempre sai vitima, liu-liu bainhira atu ba tuir aulas, transporte laiha hodi lori ba Hera, tanba ne’e sira husu ba parte UNTL atu hare kestaun ne’e.
“Ami lakon ona ami nia kolega hamutuk nain neen iha loron 28 Outubru 2010, tan deit laiha transporte no sira sa’e tuir deit kareta kamioneta, e ami husu para iha tempu besik bele utilize ona dormitoriu ne’e,” Senadu Gomes sujere.
Hatan ba kestaun ne’e Dekanu FEST, Gabriel António de Sá, katak, lolos dormitoriu ne’e inagura iha 26 Abril 2013, maibe kansela tanba Konselhu Jestaun UNTL nian seidauk aprova.
“Presiza hadia, aumenta tan volume bee, fatin tein nian no lavandaria inklui presiza halo kriteriu balun bainhira estudante sira hela iha ne’eba,” Dekanu de Sa dehan.
Entretantu Diretor Administradór Jerál UNTL, Mateus Fernandes hateten Dormitoriu seidauk bele utiliza tanba sei falta lavandaria no fatin tein maka seidauk pronto.
“Ha’u promote katak lavandaria no fatin tein ne’e sei halo iha fulan ida nia laran, se promote ne’e la sai realidade, hau sei rezigna an husi Diretor Administrador Jeral UNTL nian,” Diretor Fernandes promote.