- Publika iha: 17 Julho 2013
Profesores voluntariu iha eskola Ensino Baziku Debur-Butir, iha suku Funar, Distritu Manatuto, ne’ebe hanorin durante tinan barak ona nia laran, ejiji ba governu atu halo rekruta sira sai permanente.
Pedro do Santos, profesor voluntariu ne’ebe hahu hanorin iha eskola ne’e desde tinan 2007 maibe to’o agora sira nia estatutu seidauk klaru.
“Ami durante ne’e hanorin sein salariu, tanba ne’e ami husu ba governu atu konsidera ami sai hanesan professor kontratadu iha eskola ne’e,” professor dos Santos ejiji, iha Laclubar, Manatuto.
Entreatntu Diretor Eskola Ensino Baziku Debur-Butir, Nuno da Costa Almeida rekonese katak, professor voluntariu sira durante ne’e oferese duni sira nia an hodi hanorin alunus sira sai matenek.
“Ami espera katak governu bele foti sira sai professor kontratadu,” Diretor Almeida esperansa.
Diretor ne’e dehan, durante ne’e sira simu deit osan konsensoens estudante sira nian, $40 no balun $50 kada fulan, nune’e bele sosa netik sabaun ka rinso ruma.
“Mais agora osan konsensoens periodu rua nian laiha, entaun sira la hetan buat ida,” Diretor ne’e dehan.
Tanba ne’e diretor ne’e husu ba Ministeriu Edukasaun atu halo kontratu ba professor voluntariu sira ne’e sai permanente, tanba sira iha professor ne’e limitadu tebes.