- Publika iha: 11 Julho 2013
Eskola Tekniku Profesional Sub-distritu Same,Distritu Manufahi dadaun sei menus profesores atu hanorin estudantes sira.
Estudante terseiru ano, Simao da Costa Xavier, hateten durante ne’e professor nain ida bele kaer materia hat to’o lima hodi hanorin estudante sira.
“Se professor ida mak hanorin material hat ka lima, oinsa mak ami nia prosesu aprendijazen bele la’o ho diak,” Estudante Xavier preokupa, iha Same, Distritu Manufahi.
Tanba ne’e nia parte husu ba Ministeriu Edukasaun (ME), atu hare kestaun ne’e tanba se la’e fo impaktu ba estudante sira.
“Ne’e problema bo’ot tanba estudante mak futuru ba nasaun,” Estudante Xavier preokupa.
Preokupasaun hanesan hato’o mos husi Estudante Joao da Costa, katak atu hasae kualidade estudantes, profesores tenke sufsiente no kualifikadu.
“Ami husu ba governu, se bele karik aumenta tan profesor atu nune’e bele hanorin ami ,” estudante da Costa sujere.
Entretantu membru Komisaun F (edukasun ,saude,kultura,veteranus no igualidade jeneru), Deputadu Leonel Marcal katak, menus profesores la’os problema urjenti atu resolve maibe importante mak kualidade professores nian.
“Ita koalia kona ba rekursu humanus,ita koalia konaba kapasidade entaun ita presiza tempu,” Deputadu Marcal dehan.
Kona ba hasa’e kualidade profesores, oras ne’e dadaun Ministeriu Edukasaun loke hela formasaun ba profesores, hodi aumenta sira nia konesementu.
“Ida ne’e ami komisaun Fejiji ona ba iha Ministeriu Edukasaun, atu kria sistema ida diak hodi hare kona ba problema ne’ebe mak akontese iha eskola hotu-hotu,” Deputadu Marcal tenik.