Prosesu Avaliazaun Ba Ensinu Superiór Kontribui Hodi Hadia Kualidade

Ministru Ministerio Ensinu Superior Siensia no Kultura (MESSK), José Honorio Pereira Jerónimo, dehan instituisaun ensinu superior sira presiza halo avaliasaun instituisional, nune’e mós ba kursu sira, hodi bele kontribui ba hadia kualidade.

Nia dehan, ensinu superior ne’e kualidade importante tebes, tanba ne’e tenke hadia kualidade ensinu, identifika nesesidade kada instituisaun, transparénsia prosesu edukasaun, no kualidade prestasaun, oinsa uza rekursu no hatan ba espetativa kada servisu nian.

“Prosesu avaliasaun ne’e importante tebes hodi bele hadia kualidade iha ensinu superior, nune’e kontribui ba dezenvolvimentu pais nian. Ita iha ona ensinu superiór ne’ebé akreditadu iha Timor-Leste hamutuk 19, ita sei esforsu atu bele hadia nia kualidade,” Ministru MESSK Jerónimo hatete.

Nia dehan, prosesu avaliasaun ne’e envolve husi avaliadór nasionál no internasionál, tanba ne’e husu kolaborasaun iha prosesu avaliasaun atu implementa ho rigór dedikasaun, transparensia atu konkretija objetivu ba kualidade ensinu superior nian.

Iha parte seluk Reitór Universidade da Paz (UNPAZ), Adolmando Amaral dehan avaliasaun ne’e ajuda kurije lakuna sira, nune’e mós bele fó hanoin hodi bele hadia kualidade ensinu nian.

“Iha avaliasaun ne’e ita tenke halo justifikasaun loloos ba lakuna sira, tanba avaliasaun ne’e tulun tebes ita, oinsá atu bele la’o ba oin,” nia informa.

Nia dehan, UNPAZ tenke esforu hodi justifika lakuna sira, nune’e bele hadia kualidade, tanba universidade privada ne’e, maioria povu bai-bain nia ona mak aprende.