Konstrusaun Ba ESG Hera Dadaun Ne’e Paradu

Konstrusaun ba Eskola Sekundáriu Jerál (ESG) Hera-Díli, dadaun ne’e paradu tanba abandona hodi kompañia ne’ebe hetan kontratu.

Diretór ESG Hera, Antonio Pinto dehan, eskola ne’e hetan estragus tanba mota sobu iha momentu akontese dezastre naturais iha dia 4 abril tinan 2021, tanba ne’e Ministériu Edukasaun Juventude no Desportu (MEJD) tau osan hodi halo fali konstrusaun foun ba edifísiu refere no saladeaula rua.

Nia dehan, eskola ne’e hahú konstrui husi kompañia ne’ebe manan kontratu iha dia 17 maiu tinan 2022 no iha kontratu katak sei finaliza hodi entrega ba MEJD no eskola iha 5 juñu maibé to’o agora seidauk konstrui hotu.

“Konstrusaun ba Eskola Sekundariu Jerál (ESG) Hera, dadaun ne’e paradu tanba abandona husi kompañia,” Diretór Pinto dehan.

Tanba ne’e nia husu ba MEJD atu bele halo investigasaun ba kompañia refere abandona total konstrusaun ne’e, tama ona 15 juñu mós la orienta nia traballadór sira halo servisu.

“Ami husu MEJD atu bolu urjentemente na’in ba kompañia hodi halo investigasaun ida profunda katak tanba saida mak sira abandona konstrusaun ne’e no sira sei kontinua fali ka la’e ona atu ami mós bele hatete,” nia husu iha Vila-Verde.

Nia dehan, totál estudante iha eskola refere hamutuk na’in 165 no profesór hamutuk na’in 34 dadaun ne’e sira realiza prosesu aprendizajen utiliza de’it saladeaula rua maibé la sufisiente dadaun ne’e mós hetan ameasa husi mota tanba iha kotuk ne’e rai monu hotu ona.

Entretantu, Diretór Nasionál Dezenvolvimentu Eskolár iha MEJD, Agostinho Soares dehan liga ba konstrusaun eskola ne’ebé mak konstrusaun paradu ne’e ministériu rasik bolu ona kompañia hodi husu klarifikasaun no sira dehan iha problema privadu no sira sei kontinua fali konstrusaun.

“Maibé ami la importa ho problema interna kompañia nian, maibé ami hanesan projetu na’in eziji nafatin atu projetu ne’e tenke la’o,” nia dehan.

Nia dehan projetu ne’e tenke la’o atu nune’e labele sakrifika fali ministériu, estudante no professór sira iha eskola tanba durante ne’e ekipamentu ba eskola ne’ebé limitadu tebes, presiza kompleta ho edifisiu foun ne’ebé konstrui ne’e.