- Publika iha: 30 Novembro 2012
Timor-Leste Coalition for Education (TLCE) preokupa tebes ho ambiente Eskola Filial Pre-primaria Beduku Mota Ulun , Distritu Dili ne’ebe la favoravel ba sira atu tuir prosesu aprendizajen ho diak tanba Kompania Interprise Group ne’ebe halo produsaun dulas fatuk besik iha area ne’e halo rai rahun suar maka’as hodi tama to’o iha sala aulas laran.“Dulas fatuk ne’e besik liu eskola kuaze tama ba iha eskola halo labarik sira hetan moras TBC nain tolu ka nain hat hanesan ne’e, ooras ne’e dadauk sira sei halo tratamentu hela iha ospital,” dehan Kordenador Timor-Lste Coalition for Education (TLCE), Matias dos Santos, iha Kai-koli, Dili.
Tanba ne’e nia sujere ba Ministeriu da Edukasaun, tau urjemente problema ne’e tanba se la’e estudante sira bele hetan moras hotu.
“Oinsa para bele kopera kompania ida ne’e para atu bele hare asuntu ida ne’e, tanba agora dadauk labarik nain tolu mak hetan moras TBC no halo hela tratamemntu iha klinika Tibar,” Kordenador TLCE ne’e sujere.
Hatan ba preokupasaun ne’e Xefe Departamentu Ensino Baziku, Aquelino Gusmao Soares katak to’o agora nia parte seidauk simu informasaun kona ba problema ida ne’e.
“Enfelismente ami seidauk simu informasaun direitamente husi Diretor Eskola Filial Beduku, ne’ebe ami la iha informasaun klaru kona ba situasaun ida ne’e,” Xefe Soares dehan.
Maske nune’e Xefe Departementu ne’e sei konfirma ba Diretor eskola refere atu oinsa mak bele buka solusaun ba problema ne’e.