- Publika iha: 30 Novembro 2012
Tinan hitu (7) ona Estudante husi Eskola Pre-sekundaria (EPS) Zumalai, Distritu Covalima okupa salas aulas eskola Pre-Primaria hodi hala’o prosesu aprendizajen, tanba sira nia fatin (eskola) laiha.“Tinan hitu(7) ona labarik sira eskola nafatin iha Pre-primaria nia fatin hodi halo aprendisajen,” levanta Deputadu Natalino dos Santos iha Plenaria Parlamentu, iha PN.
Maske nune’e governu liu husi ministeriu Edukasaun seidauk toma atensaun ba problema ne’e,liu-liu oinsa mak bele hari eskola (gedung) foun ba estudante sira ne’e.
Alende ne’e tuir Koordenador Programa Timor-Leste Coalition Of Education (TLCE), Matias dos Santos katak, kondisaun eskola ne’e la favoravel atu estudante sira hala’ prosesu aprendizajen fatin ne’e.
“Ba ami nia hare, Ministeriu Edukasaun tenke toma imediatamente ba ida ne’e,se la’e aprendizajen ne’ebe mak durante tinan barak hala’o to’o mai agora la iha rezultadu ne’ebe mak diak tanba kondisaun la favoravel ba estudante sira ne’e,” tenik Kordenador TLCE ne’e.
Atu hetan rezultadu aprendizajen ne’ebe diak no ho kualidade, tuir nia estudante sira husi eskola Pre-sekundaria tenke iha eskola ketak-ketak.
“Tanba ne’e ami sujere ba iha Ministeriu Edukasaun atu toma atensaun, nune’e prosesu aprendizajen estudante husi eskola rua ne’e bele la’o ho diak,” sujere Kordenador ne’e.
Hatan ba kestaun ne’e Xefe Departementu Ensino Baziku (DEB), Aquelino Gusmao Soares katak,Eskola ne’e agora dadauk iha ona levantamentu de dadus ba nova konstrusaun.
“Iha 2013 tama ona iha lista,purtantu provizoriamente sira uza edifisiu primeiru no segundu siklu para la’o dadauk aprendizajen,” hatan Xefe Departementu EB ne’e.
Nia dehan, konstrusaun ba EPS.Zumalai ne’e tama ona iha lista iha 2013 bele halao ona konstrusaun eskola foun ba estudantes sira.
“La’os eskola ne’eba ne’e deit ,iha eskola balun mos akontese hanesan ne’e,terseiru siklu seidauk iha kondisaun ida ne’ebe ke diak,” xefe Departementu EB ne’e katak.
Nia hateten,estrutura ba eskola ensino bajiku ne’e foin komesa iha 2010 ela’os tanba orsamentu mak laiha maibe eskolas mak barak liu “ita bo’ot hatene iha 202 eskolas, la’os eskola oituan,ne’ebe gradualmente ita la’o 2010 mak hari estrutura ensino baziku,” Xefe Soares informa.