- Publika iha: 02 Abril 2012
Tuir Diretor Edukasaun Distrital Distritu Baucau, Januario Cabral hateten iha 2013 programa merenda escolar sei implementa ho diak liu tan tinan 2012, tanba stok foun tama tiha ona iha armajen.“Hahan foun komesa tama ona armazen nasional, ne’ebe sei iha preparasaun ba ezame primeiru period ne’e hotu, hahan sira ne’e mos sei drop tutan fali ba armazen iha Distritu sira,” hateten Diretor Cabral, semana kotuk (26/03) iha Tirilolo, Baucau.
Diretor Cabral hatutan, hahan sira ne’e komesa distribui ona ba iha eskola sira hotu iha Distritu Baucau tuir takaran (medida) ne’ebe iha.
“Ami rasik ba akompania iha escola sira, escola balun iha ema balun fo labarik sira duni e agora dadauk iha escola siria ne’e merenda escolar sira hahu hotu ona, ” Diretor Cabral dehan tan.
Tuir Diretor Cabral, tinan ida ne’e programa merenda escolar sei la’o diak liu kompara ho tinan hirak ne’ebe liu ba.
“Tamba koto sira ne’ebe ikus ne’e mesak iha kualidade ne’ebe diak no estudante sira konsumu duni tuir papel educasaun nian iha planu sei fo subsidio ba alunus ida-ida ho quarter ba loron ida nian hodi sosa modo,” katak Diretor Cabral.
Iha parte seluk Koordenador Escola Filial Bairo Lutumutu, Cancio Antonio Belo hateten programa merenda eskolar la’o desde uluk maibe iha Janeiro ne’e sira aloka duni nutrisaun.
“Ami iha ne’e sei bazeia ba dadus ne’ebe tinan uluk nian ne’e iha 150, ne’ebe sira drop mai sei bazeia ba nomor uluk nian,” hateten Koordenador Belo.