- Publika iha: 26 Março 2012
‘’Program merenda eskolar ne’ebé aplika iha eskola ne’e diak maibe presiza hare ba menu hanesan koto no etu, presiza troka, tanba alunus sira bosan, Ministeriu Educasaun presiza tau matan ho sustentabilidade kuantidade no kualidade produsaun hortikultura iha ita nia rai laran ne’ebe menus tebes, presiza kopera hamutuk ho parte kompetente atu hasae produsaun local,” rekomenda Diretor Faria, semana kotuk iha Oe-Cusse.
Tuir Diretor Faria, Departementu Edukasaun Rejional Oe-Cusse tenke servisu hamutuk ho Diresaun Agrikultura e Peska Distrital nian inklui Konselu dos Paiz hodi kontribui hasa’e produsaun hortikultura.
Diretor ne’e dehan, ba future Governu prepara deit fos no modo sosa deit husi komunidade sira nian ne’ebe sira kuda ka produs.
‘’Hau rona iha tinan ne’e, ita nia Governo troka ona menu sira ne’e hanesan prepara fos no hola modo iha komunidade ka tos nain sira, ne’e diak e tenke kontinua para iha dalan klaran,” Diretor Faria esperansa.
Entretantu Diretor Agrikultura e Peska Distrito Oé-Cusse, Josê Oki rekonese katak kuantidade no kualidade produsaun hortikultura iha Distrito Oé-Cusse menus e iha future sei hametin liu tan relasaun servisu ho parseiru sira hodi hasae produsaun produtu local no garante sustentabilidade nutrisaun merenda eskolar.
‘’Los duni ita nia produsaun local sira ne’e la dun sufsiente atu responde ba programa merenda eskolar iha ita nia rai laran, maibe ba oin ami serbisu hamutuk ho parseirus Dezenvolvimentu atu koalia kona ba asuntu ida ne’e, oinsa mekanismu hasae produsaun local,” Diretor Oki dehan.
Iha sorin seluk tuir Diretor Educasaun Rejional Oé-Cusse, Justinho Neno katak implementasaun programa merenda eskolar ba tinan ne’e governo prepara deit fos, enkuantu kona ba modo Governo prepara osan hodi sosa produsaun local iha rai laran.
‘’Ba tinan ne’e ita nia Governo iha mekanismu atu responde ba problema merenda eskolar ne’ebé maka la’o ladun diak, hanesan.ita nia Governo prepara fos no osan atu sosa modo iha rai laran ne’ebé maka agrikultores sira prepara,” Diretor Neno afirma.