- Publika iha: 26 Março 2012
Estudante feto nain 82, husi Eskola Pre-sekundariu iha Sub-distritu Oesilo, Distritu Oe-Cusse tenke lakon sira nia hela fatin (asrama) tanba ahi han motuk.Ahi ne’ebe diskunfia sirkuita husi eletrisidade ne’e, estudante sira lakonsege salva sira nia sasan hotu.
“Hanesan ita hare katak agora labarik sira lakonsege atu salva sira nia sasan hirak ne’e inklui sira nia roupa hatais mos ahi han hotu, tanba ne’e mak ami hakarak hatete sai no ita bo’ot sira rasik mai to’o iha fatin ida ne’e, direitamente ne’e ami fo agradese tebes tanba Vice Ministru rasik mai to’o iha ami nia fatin hodi hare direitamente dezastre ida ne’e,” hateten Diretor Eskola Pre-sekundariu, Anacleto Atolan, semana kotuk iha Distritu Oe-Cusse.
Tuir Diretor Atolan, asrama ne’e rasik hari ho objetivu atu fasilita estudante feto sira, liu-liu sira ne’ebe hela do’ok bele hela iha fatin ne’e, nune’e sir abele konsentra ba estuda.
Nia hatutan, asrama ka dormitoriu ne’e rasik foin inagura husi Embaixador Japaun Iwao Kitahara no Ministru Edukasaun Joao Cancio Freitas iha tinan 2011.
Diretor ne’e konta, katak akontesementu ne’e akontese iha tuku 08:00 kalan bainhira labarik sira halo orasaun kalan nian iha aula eskola laran e derpente ahi bobar sae iha uma leten.
Nia dehan tan katak dezastre ne’e akontese tanba sirkuita husi ahi electrisidade tanba tuir informasun katak iha fatin ida ne’e mos iha laho.
“Tanba ne’e hau deskonfia katak laho maka han tiha fiu ne’e nia kulit maka depois akontese sirkuita ne’e,’ nia katak.
Hatan ba kestaun ne’e Vise Ministru Edukasaun, Paulo Asis Belo ne’ebe tun diretamente iha fatin akontesementu katak buat hotu dezastre ne’ebe husu ba labarik sira tenke iha vontade nafatin atu kontinua sira nia estudu.
“Hau hatene katak dezastre ne’e mosu ne’e iha dormitoriu klaru katak sei lakon fasilidades tomak iha aula ne’e nia laran inklui sasan labarik sira nian tanba ne’e maka hau ohin mai ho sasan maka hanesan, fos, koto, balde, bikan, kopu, tasu, sanan, sabaun, livru, no lapijeira, atu nune sustenta netik iha loron hirak ne’e nia laran,” Vise Ministru Belo dehan.
Kona ba bainhira atu rehabilita fali fatin dormitoriu ne’e, Vise Belo dehan nia parte labele promote tanba buat hotu sei tuir nia prosesu.
“Husu ba inan-aman sira atu labele impede labarik sira nia eskola, sira nia prosesu aprendizajen iha eskola, tenke la’o nafatin atu nune aban bain rua bele lori futuru Timor-Leste ba oin,” Vice Ministru Edukasaun ne’e hateten.
Iha fatin hanesan Reprezentante inan-aman, Domingos Quelo Caet, husu lisensa ba parte eskola nian, atu sir abele lori sira nia oan fila ba uma tanba agora dadaun labarik sira ne’e roupa iha isin lolon deit.
“Ami husi inan aman husu ba profesores sira atu nune bele fo netik tempu atu nune ami bele fila ba uma lai tanba agora sira la iha roupa seluk hodi troka inklui mos sira nia farda escola mos ahi han hotu,” Caet husu lisensa.