- Publika iha: 26 Março 2012
“Ami aluga Escola Pre-secundario No. III Vila Nova Tirilolo Baucau fulan ida selu $ 50 dollar,” hateten Reitor UNDIL, Antonio Cardoso iha semana kotuk (09/03)iha Estadio Vila Nova Baucau.
Tuir Reitor Cardoso, UNDIL Baucau loke ho Fakuldade tolu mak, Fakuldade Direitu- Siensia Direitu (Fakultas Hukum-Ilmu Hukum), Fakuldade Edukasaun (FKIP) ; Departementu Inglesh, Matematika no Fakuldade Saude Publiku.
Kona ba Dosente ne’ebe atu hanorin, Atual Deputadu Parlamentu Nasional ne’e dehan, Professores husi Eskola Ensino Secundario mak hanorin part time no dosente husi UNDIL Nasional kada Sexta no Domingo mai hanorin iha Baucau.
Iha Parte seluk tuir Membru Parlamentu Nasional, Deputada Ilda Maria da Conceicao katak Unversidade ne’ebe seidauk hetan akreditasaun seidauk bele loke ninia ramos ou cabang iha Distritu seluk.
“Se loke cabang iha Distritu seluk e estudante barak ba tuir prosesu aprendizasen iha ne’eba, aban bainrua sei fo impactu ba estudante sira atu bele buka servisu,” hatete Deputada ne’e.
Tuir Deputada da Conceicao katak, estudante husi universidade la akreditadu, bainhira atu apply servisu ruma, nia tenke tuir tan ezame nasional iha Ministeriu Edukasaun (ME) foin bele hetan sertifikadu no bele hetan servisu.