Sexta, Junho 14, 2024
Total visitors: 766366

Diretora Ezekutivu Organizasaun Fundasaun Alola (FA), Maria Imaculada Guterres hateten esforsu promove feto iha poder foti desizaun nivel altu hatudu sinal di’ak tanba partidu polítiku sira ne’ebé hetan asentu iha parlamentu komesa fó fiar ba feto potensial hanesan Deputada Maria Fernanda Lay, lidera Parlamentu Nasionál nu’udar Prezidente Parlamentu Nasionál.

Diretora Ezekutivu Organizasaun Fundasaun Alola (FA), Maria Imaculada Guterres hateten esforsu promove feto iha poder foti desizaun nivel altu hatudu sinal di’ak.

“Ba dahuluk istória Timoroan nian, komesa ona tau importánsia konsidera feto nia matenek no kapasidade hodi fó konfiansa ba feto atu lidera Parlamentu Nasionál nu’udar Prezidente Parlamentu Nasionál. Ne’e ita foin haree primeru iha ita-nia istória tanba hahú lejislatura I to’o mai VI lejislatura mak ita haree partidu polítiku sira komesa fó ona konfiansa másimu ba feto potensiál lidera iha Parlamentu Nasionál,” nia hateten via telefone.

Nia dehan rezultadu ida-ne’e orgullu bo’ot ba movimentu feto Timor, ne’ebé durante tinan 20 halo esforsu makas promove feto iha poder foti desizaun nian tanba feto barak matenek no iha kapasidade bele halo mudansa ne’ebé signifikante ba dezenvolvimentu nasaun nian.

Nia konsente iha progresu di’ak ba reprezentasaun feto iha poder foti desizaun nivel nasionál, maibé iha nivel munisipál no lokál sei presiza esforsu makas liutan atu hetan fiar husi sosiedade.

“Ami iha esperansa bo’ot ida katak, maské ita agora haree feto komesa hetan fiar tur no hola parte iha foti desizaun nivel altu. Maibe luta ne’e sei naruk tanba ita haree parte estrutura governu nian no parte nivel kraik lideransa komunitária, ita sei presiza esforsu makas liutan atu envolve feto iha poder foti desizaun nian,” nia hatutan.

Iha oportunidade ne’e nia kontratula feto pontensiál sira ne’ebé eleita nu’udar membru parlamentu iha VI lejislatura no Deputada Maria Fernanda Lay ne’ebé eleita nu’udar Prezidente Parlamentu Nasionál.

Tuir observasaun TDW iha terenu nota katak feto potensiál ne’ebé eleita iha VI lejislatura nu’udar membru Parlamentu Nasionál hamutuk nain 23 ka 35% husi totál membru 65.

Iha parte seluk, Deputada Maria Teresa da Silva Gusmão hateten natureza Deputada/o sira-nian mak sai lian, matan no tilun ba povu tanba ne’e sei servisu makas ho didikasaun tomak hamutuk ho governu no entidade hotu hodi lori moris di’ak no dignu ba povu tomak.

“Natureza deputada sira-nian mak sai lian, matan no tilun ba povu. Entaun konfiansa ne’ebé fo ba ami hanesan mós feto iha kompromisiu bo’ot atu halo mudansa ba povu no nasaun bele hetan prósperu no asegura povu moris di’ak,” nia hateten

Nia dehan sei buka servisu hamutuk ho entidade sira hotu atu luta hodi halakon forma diskriminasaun hotu hasoru feto no labarik sira ne’ebé nu’udar futuru ba nasaun nian. No asegura labarik sira hetan edukasaun, atendimentu saúde no protesaun.