Lei Invalida, Kontentor Kontinua Halai Loron

Kareta kontentor ne’ebe lolos halo operasuan iha tempu kalan, maibe realidade kontinua halai loron hodi okupa estradas, tanba dekretu lei ne’ebe governu produs hodi regula kestaun ne’e agora invalida.

Kestaun ne’e hamosu lamentasoens husi Membru Parlamentu (MP) Jose Luis Guterres, tanba okupa estradas no hamosu engravamentu iha sidade laran.

“Governu tenke kontrola no regula ida ne’e, tanba kareta bo’ot demais entaun impede trafiku,” MP Guterres lamentavel, iha Parlamentu Nasional.

Tuir nia, ministeriu kompotente tenke iha seriadade atu garantia implementasaun dekretu lei ne’ebe mak produs ona.

Nia kompara, iha nasaun seluk sempre iha regulamentu ba kareta kontentor sira, bele halai maibe bazea ba orario.

“Ezemplu la’o kalan husi oras hira to’o oras hira, ne’e orariu iha tiha ona,” nia hateten.

Hatan ba kestaun ne’e Assesor II Vise Ministru Transporte e Komunikasaun, Basilio M.X. Teixeira rekonese katak iha tinan 2013 governu produs ona dekretu lei ida hodi regula kontentor labele halai loron, maibe lei ne’e agora invalida tiha.

“Agora iha hanoin ona atu halo fila fali hodi regula kontentor sira ne’e,” nia hateten.

Foin lalais, nia dehan governu konsege estabelese ona Asosiasaun Portu Timor –Leste (APORTIL) ho nia knar hodi kontrola no regula kontainer sira ne’e.

“APORTIL mak sei hala’o servisu ne’e, kria fatin ba kontainer sira ne’e inklui maneja kontainer sira nia vigilansia,” nia hateten.

Nia mos rekonese, kontainer hirak ne’e wainhira la’o iha tempu meudia no dader atrapalha tebes kareta no motor inklui kria engravamentu iha estradas.

Iha parte seluk komunidade Manuel Guterres, hateten kareta kontainer lolos la bele la’o iha tempu dader no meudia, tanba tula sasan barak no todan,  bele fo perigu wainhira akontese asidente ruma iha estrada.

“Tenke la’o kalan para estrada mamuk,” nia sujere.