FM: Servisu F-FDTL Nian Iha Mudansa

Bazea ba observasaun husi Fundasaun Mahein (FM) ne’ebe durante ne’e halo peskiza ba servisu autoridade seguransa inklui mos ba Forsa Defeza, katak servisu membrus Forsa Defeza Timor-Leste iha mudansa.

Koordenador Peskiza Fundasaun Mahein, Sancho Xavier hateten sira nia servisu ne’e iha mudansa tuir evolusaun e to’o agora sira iha progresu ona.
“Tanba uluk ita haree Falintil-Forsa Defeza Timor-Leste ita rona iha problema oin –oin hasoru komunidade sira bar-barak maibe agora ne’e la’e,” nia observa, iha Dili.
Maibe dadaun ne’e, nia dehan iha ona mudansa tanba iha politika forsa nian hodi dezenvolve tuir faze por faze.
Nia hateten, Instituisaun Forsa Defeza transforma husi Falintil ne’ebe agora F-FDTL, forma iha dia 2 Fevereiru 2001 no agora halo ona tinan 17 sira nia prezensa.
Nia hateten, durante ne’e F-FDTL avansa ona tanba uluk liu forma ona planu 20-20, oinsa atu dezenvolve futuru F-FDTL nia ba forsa professional ne’ebe moderna.
“Ho ida ne’e ita halo ona desmobilizasaun ba Falintil sira no reforma ona membro sira ne’ebe mak tama ona idade 60 ba leten.
Nia dehan, reforma ida ne’e tenke iha nia kontinuasaun atu nune’e bele dezenvolve forsa defesa Timor-Leste tuir evolusaun forsa moderno nian.
Entretantu Komunidade Jacinto das Neves, iha nia observasaun durante ne’e Falintil -Forsa Defesa Timor-Leste nia serviso ne’e iha mudansa tebes.
“Uluk ne’e membru balun sempre kria problema ba komunidade sira maibe dadaun ne’e ladun ona tanba sira iha lei ne’ebe rigorozu regula sira,” nia observa.
Alende ne’e, nia hateten maske sira hasoru difikuldade oin –oin iha sira nia atividade maibe sira nafatin pronto hodi servi povu ida ne’e.
“ Mai ita hotu agradese ba ita nia Falintil-Forsa Defesa Timor-Leste ne’ebe nafatin prontu atu servi maske hasoru situasaun defisil, sira nunka hakiduk,” nia agradese.