- Publika iha: 21 Fevereiro 2018
Ministerio da Saude ho parseiru sira sei hala’o kampanha nasional kona ba saude maternu infantile no nutrisaun nian durante tinan tomak, hodi hasa’e konesementu no konsiensia komunidade sira nian atu fo importansia ba saude.
Diretora Jeral Prestasaun Servisu Ministerio Saude, Odete Viegas hateten nutrisaun no saude maternu infatinl sai hanesan prioridade ba iha ministerio tanba risku maka’as ba iha programa sira ne’e mak inan isin rua no labarik tinan lima mai kraik.
“Hato’o ba parseiru sira, katak objetivu principal husi programa hotu tenke haree ba familia tanba moras hotu mai husi familia, edurante ne’e ita trata ema individu ne’ebe moras la haree ba iha familia tomak,” nia hateten, iha Dili.
Nia rekonese, katak servisu prestasaun saude la’os deit mai husi Ministerio da Saude, maibe barak mos husi parseiru sira, e ministerio iha responsabilidade atu integra sira hamutuk atu halao servisu atendimentu ne’e diak liu tan ba komunidade sira.
Nia dehan, ba oin ministerio sei tenta koalia nafatin ho parseiru sira atu labele implementa programa hamutuk deit iha munisipio ida, maibe fahe malu atu munisipio hotu bele hetan atendimentu, tanba iha munisipio balun organizasaun sira laiha e balun mos barak liu.
Nia mos, husu ba parseiru sira ne’ebe implementa programa iha baze, tenke kontaktu diresaun relevante sira iha Ministerio da Saude no pontu vocal sira tanba agora dadaun prezensa pontu vocal promosaun saude iha munisipio hotu no sentru saude sira.
“Ami hanoin, katak ba oin ita esforsu maka’as liu tan prevensaun moras ba komunidade hodi redus numeru morbilidade (moras) mai iha ospital,” nia hatutan
Nia informa, tinan ida ne’e Minsiterio da Saude sei iha atividade bo’ot rua mak hanesan visita integradu ba familia sira no kampania nasional ba iha imunizasaun ne’ebe sei hala’o iha fulan Julho.
Nia hateten, sira sei utiliza rekursus ne’ebe ministerio iha atu halo promosaun saude liu husi media nasional sira hanesan TV, Jornal, Radio liu –liu radio komunidade sira no halo dezeminasaun informasaun direita ba komunidade iha baze.
Entretantu, Jerente Programa Saude Inan ho Oan iha Fundasaun Alola, Macu Guterres hateten atividade ne’ebe sira hala’o mak edukasaun promosaun saude ba iha komunidade sira nivel aldeia.
Nia dehan, atividade sira hanesan demontrasaun tein aihan local, ho objetivu atu eduka komunidade sira utilize aihan local ne’ebe nakonu ho nutrisaun ba sira nia konsumu lor-loron.
Alende ne’e, sira mos halo atividade akonselhamentu ba inan isin rua sira kona ba kuidadu ante natais liu –liu visita regular ba fasilidade saude, konsumu aihan ne’ebe iha diversifikasaun nutrient atu fo nutrisaun diak ba bebe iha kanotak no ajuda halo planu partu ba inan isin rua sira.
“Importante mak rede koordenasaun, atu haforsa apoiu tomak iha nivel baze liu –liu sentru saude sira atu iha suplementu aihan ne’ebe apoiu ba labarik no inan sira,” nia hateten.
Tanba, nia dehan durante ne’e professional saude sira iha sentru no postu saude identifika pasiente malnutrisaun sira, tenke halo referral mai iha munisipio hodi hetan tratamentu suplementu.
Nia hateten, hahu tinan 2003 sira kobre munisipio 11, maibe tinan ida ne’e redus ba iha munisipio hitu mak hanesan Baucau, Aileu, Ainaro, Manufahi, Viqueque, Dili no Regiaun Administrativu Espesial Oe-Cusse-Ambeno (RAEOA), tanba limitasaun fundus.
Iha parte seluk Manager Programa Nutrisaun CRS, Filipe da Costa hateten governu iha planu ne’ebe kapas tebes tanba fo importansia ba iha promosaun saude iha nivel familia no sira pronto apoiu.
“Ami nia pedidu mak promosaun iha familia moras ne’ebe nivel nasional hanesan malnutrisaun, tobacco ne’e ita tenke repete nafatin depois moras ne’ebe espesifiku ba iha munisipio sira,” nia hateten.
Nia dehan, atividade ne’ebe sira hala’o mak fo treinamentu ba iha grupo feto sira iha komunidade kona ba nutrisaun atu sira bele muda sira nia hahalok.
Nia hatutan, atividade ne’e hala’o deit iha munisipio tolu hanesan Baucau, Viqueque no Lautem.