EBC 30 Agusto Bandu Estudante Lori Telemovel Tama Aula

Estruturas Escola Ensino Baziku Central (EBC) 30 Agostu hamutuk ho asosiasaun inan aman hamosu regras interna hodi bandu estudante sira lori telemovel mai eskola.

Diretor Eskola Filomeno Salsinha, hateten objetivu husi regras ida ne’e atu estudante sira bele konsentra iha materia durante prosesu aprendizajen la’o iha aula laran.
Nia dehan, ohin loron joven sira nia dependensia ba teknologia ne’e aas tebes, realidade lor-loron sira asesu ba iha internet ne’ebe bele fo benefisio ba sira nia estudu e bele mos lori sira ba risku tanba livre demais.
“Hau sujere ba governu, tenke tau atensaun ba iha kestaun ne’e liu –liu taka situs sira ne’ebe la edukativu ba joven sira atu labele influensia negaitvu ba sira,” nia sujere, iha Comoro, Dili.
Nia mos, husu ba inan aman sira bele sosa telemovel ba oan sira, maibe la signifika tenke sosa ida ne’ebe ho kualidade diak no bele asesu ba iha informasaun hotu.
Tanba, nia dehan bainhira labarik sira utilize sala, bele lori ba iha risku sira hanesan isin rua sedu, kaben sedu, husik eskola no seluk tan.
Ba estudante sira ne’ebe viola regras, nia dehan sei hetan sansaun, profesores sei prende telemovel no inan man mak tenke foti, maibe troka ho sementi saka ida kada telemovel.
Iha parte seluk, Jerente Programa Advokasia Fundasaun Alola Maria Evelina hateten profesores iha papel importante tebes atu sai guia (matadalan) ba estudante sira la’o tuir ba dalan ne’ebe los.
Nia mos, sujere ba iha eskola sira atu estabelese sentru akonselhamentu iha eskola hodi bele fo konselho ba iha estudantes ne’ebe hatudu atitude ladiak iha eskola.
“Estudante sira ne’ebe nakar, grupo profesores ne’e bele fo konselho atu sira labele utilize sala sira nia tempu aprendizajen ba iha buat seluk,” nia hateten
Nia hatutan, edukador sira mos tenke implementa politika zero toleransia liu –liu prevene linguajen sira ne’ebe perturba labarik sira nia sentiment no promove kultura respeita malu iha aula laran.
Alende ne’e, nia husu mos ba professores materia Biologia no sidadania atu halo mos esplikasaun ba estudante sira kona ba impaktu isin rua no kaben sedu ba sira nia saude no futuru.