Estudantes 300 Sai Ajente Promotor Ba Hapara Fuma

Saude Munisipio Ermera fo ona formasaun kona ba impaktu fuma ba estudantes nain 300 hodi kontinua halo promosaun saude, liu –liu risku no konsekuensia husi tobacco ba iha saude publiku.

Eis Diretor Saude Munisipio Ermera, Herculano Seixas dos Santos hateten tinan ne’e introdus inisiativa foun, ho naran programa jerasaun livre husi tobacco, ho objetivu atu redus prevalensia konsumu tobacco iha Timor –Leste no prevene jerasaun foun sira husi konsekuensia tobacco nian.
Nia dehan, estudante sira ne’e reprezentante husi eskola ensino baziku no sekundario sira iha Munisipio Ermera, tanba kontribuisaun foinsa’e sira nian ba luta kontra tobacco importante tebes.
“Atu redus, ita tenke enkoraja labarik sira atu labele fuma, hahu husi sira sei ki’ik to’o sira bo’ot sira la fuma ona no sira sei sai modelu hodi promove abitua la fuma iha familia, eskola no komunidade,” nia hateten, iha serimonia lansamentu programa jerasaun foun livre husi tobacco, iha edifisio Teras Propiedade Munisipio Ermera.
Nia hateten, papel importante ida husi grupo estudante sira ne’e mak prevene foinsa’e sira ne’ebe seidauk fuma, labele fuma no sira ne’ebe fuma ona tenke para.
Nia espera, ho involvimentu foinsa’e sira nian bele hasa’e ona kobertura kampanha no sensibilizasaun kona ba tobacco iha komunidade no enkoraja jerasaun foun sira atu labele fuma.
Nia dehan, tobacco hanesan risku potensial ba iha moras lahada’et sira hanesan moras tensaun, atakasaun fuan, diabetes meletus, struk, kankru no moras seluk tan.
Nia informa, saude munisipio Ermera hala’o ona esforsu lubuk ida mak ikus mai konsege konvense edifisio publiku, eskola, restorante deklara zona livre husi tobacco no halo sosializasaun ba komunidade.
Entretantu, Prezidente Autoridade Munisipio Ermera Jose Martinho dos Santos Soares hateten joven sira mak tenke sai duni ajente ba iha hapara fuma iha Timor –Lete hahu husi familia.
Hanesan eis fumador, nia rekonese katak hapara fuma ne’e la’os fasil, maibe tenke iha komitmentu no halo esforsu tomak mai husi individu ida –idak, nei-neik para totalmente.
Nia apresia, ho esforsu governu nian ne’ebe hamosu ona lei regime kontrolu tobacco, ne’ebe forte tebes e espera tau ona iha implementasaun, liu –liu hasa’e folin tobacco iha merkadu no halo sensibilizasaun ba negosiante sira atu labele fa’an sigaru ba labarik inklui fa’an sigaru rahun.
“Ita hamutuk, komprometidu apoiu servisu ida ne’e atu ita garantia jerasaun foun sira mai ne’e livre duni husi tobacco no sira iha saude ne’ebe diak atu kontinua luta ba dezenvolvimentu,” nia hateten.
Iha parte seluk, Pontu Vocal Jerasaun Foun Feliciano Martins pronto atu servisu hamutuk ho governu hodi hala’o servisu kontrolu tobacco iha rai laran, liu –liu iha munisipio Ermera, tanba tobacco hanesan fator risku potensial hamosu moras lahada’et.
“Ami hakarak livre husi tobacco, ami prontu hasees aan husi fuma, ami sei luta kontra tobacco no ami hakarak promove moris saudavel,” nia promete.
Nia dehan, sira sei servisu hamutuk ho saude munisipio atu halo sensibilizasaun ba iha eskolas no komunidade kona ba risku tobacco, tanba la’os deit fo impaktu ba saude maibe mos ba sosio- ekonomia familia no nasaun.