- Publika iha: 30 Janeiro 2024
Sekretariu Estadu Protesaun Sivil (SEPS), Domingos Mariano Reis informa despesa ne’ebé governu hasai kada tinan purvolta 20 milhoens dolar amerika hodi halo mitigasaun ba dezastre naturais, liu-liu apoia emerjénsia no rekuprasaun ba vitima sira tanba ne’e governu halo hela esforsu atu redus risku dezastre liu husi atividade refloresta no sosializasaun edukasaun risku dezastre ba komunidade.
Nia dehan governu dala-sia fo prioridade ba prevensaun risku dezastre tanba ne’e sei hamosu promotor edukasaun risku dezastre iha nivel suku hodi kordena ho autoridade sira mobiliza komunidade halo refloresta no halo promosaun edukasaun redusaun risku dezastre ba komunidade minimu iha koñesementu ba mensagen save hat importante mak kauza dezastre, sinais dezastre, prevensaun ba dezastre no kuidadu atu sosiedade ida-ida iha konsensia kontribui ba redus risku dezastre.
“Klaru ita hatene tinan-tinan ita investe purvolta 20 milhoens dolar amerika ba rekuperasaun no apoia emerjénsia. Ita tenke poupansa ona orsamentu jeral estadu, liu husi medida prevensaun hanesan ohin ita mai kuda aihoris hun 600 ne’e mos kontribui ba medida prevensaun iha futuru mai,” nia hateten bainhira mobiliza membru Polisia Nasionál Timor-Leste (PNTL) no funsionariu sira kuda aihoris iha foho leten aldeia terus nain suku Vila Verde, Dili.
Nia hateten atividade refloresta ka kuda aioan iha area risku dezastre sei halao kada semana iha loron sesta feira iha periodu udan monu rai.
Nia hatutan atividade refloresta iha fatin sira ne’ebé rai molik, liu-liu iha foho leten sira sei kontribui ba redus risku dezastre no problema mudansa klimatika ne’ebé sai preokupasaun global.
Konaba komunidade sira ne’ebé kee foho leten harii uma, nia dehan dekretu lei nu 7/2021 fo dalan ba sira atu sosializa informasaun ba komunidade sira atu labele halo uma iha foho leten no nafatin halo aproximasaun.
Nia informa aihoris ne’ebé sira kuda hamutuk 600 ho tipu ai-kase, baukmoruk, seroja no ai-tasi ne’ebé hetan apoia husi Sekretariu Estadu Floresta.
Iha parte seluk, Komadante Komando Pessoal no Formasaun PNTL, Superintendente Xefe Polisia Arquimino Ramos hateten sira prontu mobiliza membru sira hotu atu partisipa iha atividade refloresta iha area risku dezastre.
“Ohin ami nia membru husi komandu jeral hamutuk 300 no UEP 100, entau hamutuk 400 fahe malu balun ba kuda aihoris iha Matadoru no balun mai iha ne’e,” nia hateten.
Nia hateten numeru membru PNTL bo’ot iha munisípiu Dili, entau bele hola parte kuda aihoris sira iha foho leten hodi kontribui ba redus risku dezastre.
Tuir observasaun TDW iha treinu nota katak atividade reflorestasaun ne’e hetan partisipasaun husi lideransa komunitaria, maibe la hetan partisipasaun maximu husi komunidade sira iha aldeia terus nain suku Vila Verde postu administrativu Vera Cruz munisípiu Dili.