- Publika iha: 27 Agosto 2011
Atu labele fo impaktu ba labarik nia saude, hemu aimoruk antibiotika tenke tuir regulamentu husi ospital nian.
“Husu ba ina-aman sira bainhira oan moras labele fo aimoruk arbiru sein iha regulamentu husi parte ospital ka klinika tanba bele afeita ba labarik nia saude, tanba ne’e ita tenke hatene uluk kauza aimoruk antibiotikaba moras ne’e, foin ita fo aimoruk antibiotika ba labarik nia moras ne’e,”hateten Fatima Boavida, parteira iha sala maternidade Sentru Saude Formoza, semana kotuk iha Bairo- Formoza,Dili.
Boavida hato’o kestaun ne’e relasiona ho inan-aman barak mak ba sosa aimoruk antibiotika iha klinika privadu sira bainhira sira nia oan moras no fo hemu sira sein regulamentu husi ospitan nian.
“ne’e ladun diak e diak liu lori ba iha ospital para fo no hemu tuir regulamentu ospital nian e sir abele hemu tuir oras no tempu ne’ebe determina,”nia dehan.
Tuir nia, metode hemu aimoruk antibiotika bainhira moras mak tenke hemu minimu 3 dias no maximu 7 dias.
“Nune’e foin bele kura nia kuman ka bakteri ne’e bele mate, se karik mediku haruka hemu durante loron lima,tenke hemu to’o loron lima, dalaruma inan-aman sira fo hemu loron tolu deit para tanba oan diak ona maibe impaktu mak ne’e bainihra labarik ne’e moras noa fo hemu aimoruk, aimoruk ne’e sei la kura moras ne’e tanba sai rejistente fali iha nia isin,” nia esplika.
Entretantu tuir Staf Unidade Micro Nutriente Ministeriu Saude (MS), Epifania Margues katak inan-aman tenke lori oan ba ospital ka sentru saude bainhira labarik sira moras nune’e bele hetan tratamentu saude ne’ebe diak.
“Tenke hemu tuir regulamentu ospital nian, doutor dehan hemu durante loron 5 tenke hemu loron lima nia laran, atu nune’e labarik sir abele moris ho saudavel e aban-bainrua sira moras fo hemu tan bele kura nia moras ne’e,”nia dehan.
Tanba dala barak inan-aman sira bainhira fo hemu aimoruk lorontolu deit para ona tanba hare labarik diak ona maibe sira lahatene katak aban-bainrua aimoruk ne’e halo sira nia isin kebal tiha ona.
Alende ne’e tuir komunidade Fomento, Marizinha da Silva, katak dalabarak inan-aman sira bainhira oan moras ba sosa deit iha klinika sira maibe sira rasik lahatene impaktu husi aimoruk ne’e bainhira hemu la tuir reseita husi doutor.
“Hau so hatete deit katak dala barak oan sira moras ita inan aman rasik lakoi lori ba fasilidade saude atu hetan tratamentu maibe ita mak hakark atu ba hola aimoruk ina klinika sira nee,para fo ba labarik nee hemu,I ita mos la hatene katak nia efek-efek nee saida tanba kuandu ita la tuir regulamentu nebe iha hospital klaru katak maski ita hola aimoruk karun maibe la kura ba moras nebe atu kura,” nia dehan.
