- Publika iha: 30 Abril 2012
Parlamentu Nasional liu husi Komisaun F sujere ba iha Governu wainhira loke eskola iha Timor laran tomak karik, tenki kompleta ho fasilidade, nune’e labele prejudika ba estudante sira. “Ita tau profesores bar-barak, mais depois labele rezolve problema, ida ne’e mak ami nia ezijensia,” sujere Deputada Tereza de Carvalho, semana kotuk, (18/04) iha Uma Fukun, Dili.
Tanba tuir Deputada de Carvalho, durante ne’e eskola barak mak falta fasilidade eskola, hanesan meja no kadeira.
Entretantu Deputadu Pedro da Costa hateten, planu governu atu hari tan eskola foun ne’e tama iha Programa Planu Estratejiku Dezenvolvementu Nasional (PEDN).
“Foin dadauk ne’e mos ita orsamenta tiha ona, hein atu Governu implementa iha terenu, purke ita hare kondisaun ita nia eskola iha Timor laran tomak halo ita triste fali,” hatutan Deputadu da Costa.
Deputadu ne’e rekonese katak, eskola barak iha teritoriu Timor tomak mak la iha kondisaun, balun janela at tiha ona, balun kalen naksobu , no balun la iha meja no kadeira.
“Emprezariu sira nebe mak kaer projetu sira ne’e mos tenki espiritu nasionalismu oituan, atu nune’e eskola sira ne’e mos iha kualidade,” Deputadu da Costa sujere.
