- Publika iha: 07 Fevereiro 2012
Acacio de Jesus Bernardinu senti nia mak vitima tanba rai ne’ebe nia okupa iha parte Bairro Pite, Suku Teate deste iha tinan 1999 no ema laiha ida mak uza ne’e duni Bernardino uza hodi halao’o bisnis ofisina.
Nune’e wainhira Chefe Suku hakarak nia sai tenki ser halo aproximaaun laos ba sobu arbiru deit nia fatin ho forsa hanesan akonteses iha nia kazu.
“Hau nia kazu ne’e kona ba bengkel momentu 1999 ne’e ita iha prosesu ladun stabil agora ita fila-fali mai ne’e lei seidauk iha. Ne’ebe ami aproveita tau ofisina ida iha ne’e. Agora Xefe Suku la halo aprosimasaun ho hau, sira ba sobu uma ne’e sai a’at tia,” dehan lezadu Benardinu, iha Tribunal Distrital Dili, semana kotuk (25/1), durante nia tesi lia iha tribunal.
Nia haktuir katak wainhira Xefe Suku sira ba sobu nia ofisina nia sei tuir hela treinamentu kona ba servisu nian iha Ainaru, ne’e duni iha tempu Xefe Suku Bairro Pite ba sobu nia fatin nia oin maibe nia subrino sira mak atende maibe Xefe Suku konsege sobu duni.
“Hau tama tiha funsionariu maibe hau nia ofisina ne’e sei funsiona nafatin. Agora hau ba treinamentu iha Ainaru sira aproveita ida ne’e mai sobu tia. Mesmu ke iha tempu neba hau nia subrino mos iha maibe sira nafatin sobu,” dehan lezadu Benardino durante nia audiensia iha TDD.
Entertantu tuir Xefe Aldeia Teate, Suku Bairro Pite, hateten durante nia vez atu konta katak fatin ne’ebe sira iha momentu ne’eba sobu la os ofisina maibe barraka oan ida deit.
“Problema ne’e hanesan ne’e, ami atu halo konstruksaun Xefe de Suku foun iha rai estadu nian. Ne’e maka iha tempu ne’eba, iha barraka oan ida iha ne’eba, Sr. Akasiu nia dehan katak barraka ne’e ninian. Ne’e maka mai iha tempu neba ami halo limpeza iha fatin konstruksaun Xefe de Suku ne’e, I iha loron ami limpeza ne’e maka Sr. ida naran Akasiu akuza ami dehan ami sobu nia ofisina, dehan ami halo krimi,” dehan Xefe Alvaros.
Xefi Alvaros hatutan tan katak agora konstruksaun iha agora Xefe Suku no Xefe Aldeia bele servisu hodi servi komonidade iha suku ne’e ba, ho atendementu nebe maka diak.